Kami fi dae do tonal kam kaba fene da tewa xbana moox.  Fafu tem da xbana.
 Tonal do riq puna sifan bex-beta baa di fukan kolon dih.  Sifan dii, mama
nax anax sa mahede do kam kaba fene da pliqo.  Da pliqo naa, fene nax anax
sa moo.  Ramax eta nax anat an saa, poo anat an dii da molae eptiba aki,
kam kaba fene, "Da keha gleba."  Bisux fi di da keha gleba, anat an dii
baha-bahaah, paa da molae siba-siba di nax ina sifan, kam kaba fene,
"nipik e da ram fokok."  Sepe bisux da ram fokox, paa anato dii du lebe
tamba haah, poo kam kaba fene, "ana ram foko meden."  Bisux ana ram foko
meden, poo da molae ram kitah, kam kaba fene, "tona ana ram kitan."  Bisux
da molae ram kitan, poo folon molae suba, poo kam kaba fene, "tona folo
kaeat."  Bisux fi di folo kaeat, da molae haa, molae haa, poo kam kabax
fene, "tona ana folo xmam roin."  Bisux fi di tona ana folo xmam roin, pa
d bahaa, pa d bahaah, sepe da haa poo kam kalax fen, "tona ana folo xmam
haax."  Tona ana folo xmam haax dii, poo da siap la nake ina da xneik.
Sepe da folo xmam haa dii, poo date miqgu lalen moo, poo nax ina xneik.
Nax ina xneix dii pee,, nax ina kehah.  Nax ina keha fi dii, paa da pekah
fi dii, paa riqe bisa mancari emhewak.  Poo da molae ha-haa, da molae puna
tona folo xmam haax dii, po da bakeha, po da da puna tonal ebhaan.

Bisux fi di tonal ebhaan, kalo da puna tona breqe, do bisux fi di tonal
ebhaan, kam bakabah pa ton benet, do molae sifan an molae da puna sifan
haix, paa sifan molae ada.  Bisux fi di tonal benex dii, kam bakabax fene,
"tona breqe roit."  Bisux fi di tona breqe roix dii, poo kam kaba fene,
"tona breqe."  Tona breqe dii, poo siap la d manyaraq tu tona mhana.

Eta da puna tona mhana, do bisux fi di folo xmama dih, do kam kaba fene,
"ton kafat."  Ton kafax dii bisux, da puna tona mhan fehux.  Fidi tona
mhan fehux dii bisuk, da molae haah, poo hiban molae koni, poo kam kalax
fene, "tona hib konin an haix."  Poo tona hib koni naa poo bisa pa da
manyaraq. Poo bisux fi di hib konin paa da manyaraq dii, kam kalax fene,
"tona mhana mkedan."  Mhana mkedan dii, poo sepe da puna tona kar potin
dii poo da te haa tehux mohe.