TIFLITIT.

Tiflitix naa do mehet an.  Biasa riq kerex oto wae tean.  Do ku aqax tu
men haa, bu riqe tetap tiqgal stabil.  Dekax bu riqe tetap tiqgal stabil.
Riq tewa da mlakux bu moo, riq te mata ledax-ledax moo.  Da newe pao wae
tean, paa da gosa tirin.

Pee tuu du eguh paa du kaba ii saa fene bumanis.  Bumanis naa do du egu
tiflitit fi dii, paa du oli suba sax huma, pee teme du iko fi dii, paa du
keha niwe mera.  Du keha ni mera fi dii, paa du tatax ni mera moo, bu
musti toho tuha.  Bara tatax pa rahe moo tu musti toho tuha.  Sepe suba pa
rahe, pee tuu ma sabix fi dii, paa ma guhax, tem ma papuh.  Papuh, pee tuu
nax minya dii pee tuu ma eguh pa m taux tu botol.  Pee tuu ma ptauk e
tiflitit an naa omon ha na ma baeguh haix naa.  Usaha la supaya ma hisih
pee musi ma xmasa leux minya dih.  Masa leux minya, teme ma egu tiflitix
di pee, ma podo dae botol di lalen.  Pee tuu la ma pakek e, do ku jaga tu
ma pakex do peni la lipoton sida.  Lipoto sida pertama dih.  Jaga la ku
keha kaku pii, pokoxnya ku keha nete laga mkele-mkelet.  Neten yaq lipoto
pertama sida pee.  Egu la ku foix minya dih.  Foix, pee tuu ku foix, do
bara foix logox moo, tu foix lepax gam saka olonani.

Fene, "Fal-fala-fal-fal-fal-faleee, nam marifat e tiflitit e, fal-fale nam
marifax la lagaqo ana finaro du kita gam do i har baa nun suka rahek e,
gam na kae tiflitix naa, la ku kerex pao wae, do menax bu ka te mata moo,
dekax bu ka te mata moo, tu musun-musun, qahex-qahet e ka bakerex tu namu
laga gosa sia dih e!  Pee tuu namu marifax di pee naa, da gosa naa, do a
laha fi di kae la ku kehax yako lea lalen leqina naa, la namu marifax
gosax naa da xdoo na yako, la sane rahek e da kita yako bu lagan gosa gam
na kae tiflitix nah e."

Pee tuu foix naa, iqataq minya dii bara foix gam pao mohe-mohe, tu musti
foix lepax.  Fi na pupanan lalenan bu ma foix lepak e, fi aki morin pee bu
ma foix lepax gam aq naa.  Esnafan pila-pila bu kita foix lepax gam saka.
Kadanan foi lepak.  Bara foi logox mohe-mohe.

Dii nake engarun dii gam di ta.  Sepo dih e.