ESQAPIT. Esqapit do du kaba fene la qei ana fina. Ana fina pakek esqapit. Do du hama nake kau lahin an ada toqi, paa du wahak. Egu fua masan paa du werix. Dalu bu du wahax pa d masa, pa du werix. Apu toqi bu du werix, paa da maqi gos-gosa. Teme du tohox gam la masi paa du hama nake ien ada toqi fi la masi. Nake karomon an sa. Bia (kima) ha di du beux pa okon ma tutu meja dii, du eguh (cowry shell?). Du werik e sia. Pee tuu bia na ha na okon e do du jaga skikih. Talan emsia-msian bamoho. Ana fina nun epu, musi ana finaro musi du werix bia na ta okon an emsia-msia-msia-msia-msia-msian. Fi dae du kaba fen kima. Yako glidux kima di qaan haik e bu nax rupan ya baetak. Gebar di jaga egu pa du jaga tregu saka meja fafan. Do balalex fi sax fafan, do gila-gilat e di bia di okon di. Bu bia di balalex fi pao, do da huke conto sia ha dih e. Conto gam di ana finaro nunu ii dih. Pee tuu du eguh, paa du jaga skikih, paa du jaga kaa psiak, la ana fina mhukaro yaq du gau nunu ate mahede, fi dae du prepa fene da gau nax ate urin mahede, nax fula xbohot e, do da bakaa paspelex rahek e. Ramax riqe fene da kaah tu waktu ha doo, ramax fi di riqe rahek. Eta ana fina yaq da kita haix nax iwagu dii, du kaba fen da tewa haix fula xbohot e, do ramax tu du jaga haek e. Bisux nax fula xbohox dii eta beton pito tem da kaah. Bara lewax fi di moo. Bisux da fula xbohox dii eta beton pito tem da kaah. Ana finaro fi dae naa do hansi-hansiax do musi du pakex ii na ta, tu ana mhanaro fi dae mama sir qei ana fina dii mama da haa, do sira fene da boho, tu da rapat moo, paa sira fen ma bapodo sleu-sleun, ma bafae sleu-sleun e. Do nax rasan sa moo. Bu kalo sqapit ada, sira fene da gepe sueh ana mhana di nakek, do sira fen da rasa da mkiki gosa. I ha dii do biar ana fina dii biar da boho, bu kalo mam da pakek ii ha dii, do sira fen espaket! Ana fina dii biar da gosa pi da mkua, bu da pakex ii dii saa moo, la sir banohox fa aki bu sleu-sleun, sira fae bu sleu-sleun, do biar ana fina dii da cantik apa, fen da gosa haan doo, bu ana fina dii sira fen iko la ku pixnika peni. Tewa parsaja. Kae parsaja. Ka tewa nam ii sa moo. Gam dii pee bu ana fina bu gam dih e. Ana fina, iqax la ana mhana pee bu gam dih e. Ana mhana nakex musi faran, musi waen bara xdeme, moo do sir hek tatak. Sira fene, "Jadi moo. Kae jadi moo. Ka musi iko la ku pexnika peni." Fi dae do nake kelebihan i ha di ta. Ana fina musi pinika, ana mhana musi pinika. Ana fina musi pinika esqapit la da rapat gosa. Ana mhana musi da xnika la nakek bara waen exdemen. Faran gosa. Biar da roin, asa faran. Ha dii fi dae dii, do sir nun suka hai gam di ta. Mam faran moo, paa ka baiik fa aki, date ii sa moo poo kae toho, bapkaex ana mhana di ta, tu ana fina an dii tar tolak. Sira fen i ha dii ana mhana moo tu ana fina. Ana mhana da kaa nax kau lahin ada. Nax kau lah maqito na ada. Nax kau lahin an da eguh fi sax garan. Ada toqi da egu fi la masi. Exdemen e. Ana mhana fi dae do nakex sa qaan eptotit, exnoh maqin, kuat besi kuat tembaga. Di i ha di ta qaano diih. Exnoh maqin naa do biar ku midi eta haan doo, bu xnoh maqin naa do la kita, do ma te pakek. Yah. Kalo geba huma xkemat, geba qei nax finhaa, do da te pakek exnoh maqin moo. Kalo da qei nax walfinax do bole tu bisa da pakek soga xnoh maqin. Da pakex soga xnoh maqin do da qei ana fina, do da midi satu jaam, dua jaam. Bu iqax la da leli soga dii do bole, tu bisa pa nakex waen suba. Eta da leli ii di moo, do jadi moox. Du helux soga dii. Du helux di awan, pa du labah. Du lelih, du labah. Du labah do bole. Du labah fi di awan do bole. Bu selama du labah moo, jadi moo. Bu i ha dii do kita tewa qei la nan huma xkemax moo, tu lae nan walfinax sa pii, ana fina sa stufeix kita pii, la ma hati-sakik, do bole. Bisa ma karajaah e gam di ta. Bu la qei kita nani finhaa an rahex do ma pakex baa eptotit rahek. Eptotix naa do nax kau lahin ada pii. Nax obat-obat kau lahin naa do ada, pa du ka psix, ka psiakoro, tu nax fua masan tu nake dalu masan tuu, paa du kaa psiax ioro na ta. Kau lahin naa, do du kaa omon moo, tu kau lahin pa du wahak e. La masi pee bu gam dih e. Ada toqi, bu ii di ma te tewa qaan moo. La masi naa do ada. Yako pernaa yax egu haix, bu yax tewa qaan moo. Ma iko mhewax lawe do bole, tu bisa yax bareqah. Kalo qaan, do yax tewa qaan moo, bu ii di ha gam di segi tiga dii, luf telut e. Somon saka da tokek e conto gam di buruq olon dih e. Da spisa gosa. Paa kita slali psiax ii naa tu nake fua tu nake dalu tuu, paa ma kaah.