Fi dae Buru do du kaba fen nau.  Nau naa do la du hama la da bareqa fen
betah pi moo.  Pee tuu yax tewa, do nau dii rua.  Du fednaux tu nau nrepat
tu du fednaux tu nau enlatat.

Nau nrepat, do du hama hono, eta moo do baa di enhero maen rahek.  Du
repax eta parsiis repa, pee tuu du kaba nax doa dii sepuh, pee tuu du
repak.  Jaga tu eta betah la nau dii reqah eta betah e, do elek e parsiis
repa xkemat e.  Bu du repax gam naa, du repax date repa xkemax moo, tu
repa libe-libee, paa sir fahano bakaex ma lawe.

Umpama fen la du hama gam naa fafu sa fene fafu dii da bakaa fi da wae
olon dii do betah pi moo?  Pee tuu du reqah.  Fene, "Fafu na kaa da wae
olon."  Pee tuu du repax gam aq naa.  Du repax, eta betah la fen fafu di
kaa dae wae olon e, do elek e parsiis repa xkemat e.  Bu du repax gam naa,
du repax date repa xkemax moo, repa libe-libee, pa rema eee!  Elex leqina
do nrepax dii do parsis-parsiis repa xkemax, pa du bagawi spuqeh.  Bu sepe
beta pa nau di reqa fen fafu di da wae olon, do du repax gam aq naa,
enrepax dii di barema libee, paa sir fahano bakek e.  Fahano bakaex ma
lawe, sedaqkan e enhero maen dii somon baremax ma dae hede.  Pii hono di
du barepax dii somon barema ma dae hede.  Di nau nrepax dii.

Eta nau nlatat e, do du egu siwi isin, paa du latah tu katuen, pa siwi
isin dii baxdoo di katuen, pee tuu du kabah fen...  Gam naa geba sa mpei,
pee tuu du feda fen, "Geba naa, katefen da mata pi da newe.  La kalo fene
geba di matah, do musi datak e siwi isin di fi di katuen emtaen di.  Fen
eta da mata moo, siwi isin di te datax fi di katuen emtaen di moo."  Du
kabah gam aq naa, pee tuu du taha kau dii, do biar e kau di haa haan doo,
du lata, pa du lata gam aq naa, bu fen beta pa geba di mata moo, do siwi
isin di te datax fi di katuen emtaen di moo.  Elex siwi isin di baa sax
katuen emtaen fofon dii, du latax, pa d beta kau naa di katuen emtaen di
kanpahaxroin e, pa du latax, pa du latax, bu te bitik siwi isin di fi di
katuen emtaen di moo.

Bu fen eta geba di mata, do du latax gamaq naa lalen rua-telo pee, poo
siwi isin di katuen emtaen di datax fi di katuen emtaen dii, poo fen jadi
moo di ta.