MALEKA FAT SIA.

Kami fi dae Buru do du bakaba ii sa fene maleka fat sia.  Maleka fat sia
naa do la geba di da gauh e, do da xbana moox.  Da bakaweq dii, bu nax
anax sa moo, tu riq gau maleka fat sia naa la fen fi di riqe do da jaga
egu snapax ri nax ioro.  Ii behax di haan doo, bu da egu ri nake i behax
di ta kalo da iko toho kareman.  Nax karajaa sa pii, dugah tu ii sa pii,
do maleka fat sia ta la jaga toloq riqe.  Pee tuu musti da jaga pakah
toqi.  Da pakah tu tepux pii, da pakah tu fafu pii.  Eta da pakah moo,
bapkaix riqe.

Pee tuu eta maleka fat sia naa nake koin do bara anax meran.  Eta anax
meran, do riq bara caan anax mera hage moh-mohe.  Eta riqe caan anax mera
hage, do pasti anax meran di ta da newe moox, tu fi di  kepercayaan fi dae
do fene riq kaah.  Malekax di kaah.

Pee tu di kam nami keluarga, do ya naq geba mtuato perna dohih.  Ya naq
ina dohih di ya naq wai dih, do ana fina Kakhaqa saa, da oli fi la masi.
Ya naq mama nake enhima na ta.  Riqe tewa moo fene ya naq mama banroi haik
e.  Pee tuu riqrogo.  Riqe rogo-rogo pee, laqsuq riqe epraqix wae fene,
"Enhima, inu wae."

Mamaq fene, "Ayo enhima e, ka bara rogo fi na moo, tu yako a banroi haik."

Pee riq heka, paa ta gam ax dapur, paa da honok emhewax wae la d ino, pa
la da oli pee, anax di hageh.

Pee tuu mamaq fene, "Watix yako naq anat an, tu i an newe mooh!"

Lamsupan resex gam naa poo anat an di delax ahen an, poo beta baa di wadun
dii, do da mala sepo.  Pee tu hai di ya naq geba mtuato, do sira percaya
fene ana fina dii nake maleka fat sia di kaah.

Paa fi dae domaleka fat sia naa do eta anax meran do sir bara caan lien
mohe-mohe.  Mam sira caan lien, do sir kaah.  Pee tuu du kaah dii, pee tuu
sira batatax waen--etan dii--di karomon.  Pee tuu lamsupan gebar bakitah.
Kalo geba xnewato di, sir tewa.  Sira fene, "Ooh, geba sa nax maleka fat
sia kaa, do iqax tu date suex rahan nah."  Dii du kaba fi dae fene maleka
fat sia di kaa nax etan dih.  Di karomon pii, rahe pii.  Fene, "Geba sa
nax malekax kaa anax meran, tu da peh suex rahan."