FAFU KATUTUX BANA.

A dohi sakik e du kaba ii sa fane fafu katutuk e bana.  Fafu katutux bana
naa, bae fafu katutux tabaku.  Ha naa do geb fukaro na ta.  Geb fukaro
nunu istila naa, fafu katutuk e baku naa do geba dii da safe nax finhaa
fidi Misrete pii, fidi lisela pii, fidi Waesama pii, ha naa la qei geb
Buroro ma sax fuka unen.  Pii da safe baa di negrii dihe pii, negri megex
pii, umpama da safe ana fina anan pii, safe ana fin haax pii.  Ana fina
anan do da piara fidi roin-roin eta da bahaa, bage tuha mohe-mohe.  Ana
fin haax pee bu gamdihe.  Safeh naa, bara bage tuha mohe-mohe.  Eta kita
bage tuhah e, do ma putai katutux baku naa, pa m oli suba dii, do ma dapax
fafu katutux baku na moo.  I ha naa fen adat, adat fafu katutux baku.  Bu
eta ma xmolix paa ma bage tu nan finhaa mohe-mohe-mohe-mohe-mohe-mohe, eta
ma ol tuha la siax suba di negrii, pee tuu ana fina di bag megek e, kita
toqi bu ma bag megex, pee tuu hansi-hansiax kerex, negrii taun, ana
qasmoriro hansiax kerex, fene, "Hama ana fina naa fafu katutux baku la
geba mtuato kaa."  Do eta ana fina dii nax sala sa moo, la da puna ii sa
selama riqe ma di nax geba mtuato, da pitotan tu ana mhan dikax sa mehede,
do nax fafu dii do du kerex lea sia dihe pee du dufa.  Eta moo, nax supan
poo du dufa.  Gehan moo.  Bu fen moo tu ana fina di baptotan tu ana mhan
dikax sa haix pii, ana mhana msian pi ana mhana rua pii ana mhanar telo pi
ana mhanar paa pii, ku kerek e fafu katutux baku naa, do biar negri taun
dii kerex, do du hama fafu msian rahek e et-et-et-et-etaa fulan tan fulan
e!  Iqax la oli la xnika ana fina na fene, "San bage tu kae haik e?"

Eta ana fina di dohix, do bole, tu bisa poo du dapak e fafu katutux baku
di.  Bu fene ana fina di dohix moo, paa riq makin riq fonih e, do kerex pa
ku hama et-et-et-et-etaa, bu ku dapax moo.  Iqax la oli la xnika pil-pilix
ana fina dii.  Lomoh gos-gosa!  Pee tuu riqe dohi fen, "Eeh.  Yako tu ana
mhana saa pitotan haik e."

"Emsian pii rua pii telo pii, kabar hansi-hansiak e.  Nanbeta la kabar
hansi-hansiax, bara kaba xgerax saa moo.  Kaba xgerak emsian bu jadi moo.
Kaba xgerax rua bu jadi moo.  Biar gamdoo, bu kaba
hansi-hansi-hansi-hansiax gebar di ku batotax qaano diih."

Aa, baru dapax fafu katutux baku.  Ramax tuu du dohix pee, hansiax kerex,
poo ramax tu geda mahede poo du sekah.  Bu kabafoni, ana fina bafonih pii,
do heikanane!  Da baptotan tu ana mhana sa bu rin bafonih, do
hansi-hansiax kerex bu sondor du badapax fafu saa.  Ha dii du kabax fene
adax fafu katutux baku.  Pee tuu sepe ana fina dohik e teme dapax fafu
katutux baku naa, baru eguh fidii paa xmasax la geba mtuato kaa, teme bisa
ana mhana dii bage tu ana fina fehux diih.  Mama dapax fafu katutux baku
mahede, bara hara-harax tuu oli dii bu du te bage... Fulan tan fulan,
miqgu tan miqgu bu du te bage beta moo.  Ana fina tu ana mhana di te bage
moo.  Bu sepe dapax fafu katutux baku naa la du kaah, baru sirua bage poo
bisa paa du bapuna ior haix.