Fidae do ana mhuka nax harta yaq geba mtuax fidi ana mhana da silih la qei geba mtuax fidi ana fina, do harta yaq da haa paskali, rohi fahwaqkonin. Bisux fidii, emse hagit. Bisux fidii, exlefut. Bisux fidii, wali oko fnoin. Bisux fidii, nax pirin tokat. Bisux fidii, nax katanan kaslali fua. Ior na ta du tamba tu harta geran-gerano dii, eta hansiax nake etkeman dii utun. Qaan fene "harta pei." Roh fah waq konin naa do fene betu anax dii bahaa dii pa nax ina paqix eta fahan koni. Pee tuu geba mtua fidi ana mhana musi da egu rohi fah waq konin. Emse hagix naa do betu anax di bameran e, nax ama da ix mancari tu katuen, pee tuu da xmatax fafu pi da xmatax tonal kan da xmatax, lalu e da latax katuen tem da xmatax fafu tu da xmatax tonal, pee tuu musi da egu katue emse hagit. Emse hagit naa do hama kehet. Kehet naa do elek padahal kehet naa do ma te sopi ixnaan sa la m kaa tuha moo, tu katuen naa da baweri rahek e, la ta fidi ana fina sili ana fina. Geba sa sopi ixnaan la da kaa tu nax kehex na moo, na baqaan fene emse hagix naa. Sepo fidii, nake exlefut. Exlefux naa do fene ate ha di ana fina baroin-roin dii pa nax ina babah dii., ha di qaan fene "exlefut." Sepo fidii, wali oko fnoin. Wali oko fnoin naa do fene betu ana fina di baroin-roin, do nax ina da foih tu oko pii da foih tu loyaq pii, do musi ana mhana da egu xwali saa tufe pitux moo do tufe truax la puna wali oko fnoin. Sepo fidii, nax pirin tokat. Nax pirin tokax naa, do betu nax ina bameran-meran dii, nax ina nax piri ixnaax pee. Da te kaa campor tu gebaro nun pirin moo. Musi ri nax piri xnaax dii eta beton polpaa tem bisa da kaa campor tu pirin geran. Pee tuu ana mhana dii musi da egu pirin na ta polo geran rua, ha na pir tokat naa. Pee tuu tamba tu nax harta geran-gerano dii, harta roix, harta haat e, eta ecukux utun, pee du kaba fene ha dii harta pei. Eta libee fidi utun dii, paa utu rua, utu telo, berarti utun saa di pee dii do musti bageaq fidi ana fina da sili la qei bageaq ana mhana. Da sili tuu fafu pii, da sili tu tonal pii, da sili tu kata pii, da sili tu labun pii, da sili tu ixwagun pii, eta la qei ana mhana diih. Eta harta utun ha du bakaba fen harta pei dii, harta dii te sili harta dii moo. Eta utun megex saa, paa da gabuq pa utu rua, utu megex dii, sili harta di ta la qei ana mhana nax gebaro. Biar utun rua, utun telo, utun paa, tapi utun rua, utun telo dii, sili, sili di ta la ana mhana. Sedaqkan utun ha di ha qina da badoun tu emse hagix tu katuen dii, utun di ta sili moo. Dii fidae nax harta dii. Sepo di ta. Harta pei la bal-balax fida Buru do ii sa haan sepe saka harta pei utu na moo. Bal-balax do harta pei dii polrua geran lima rahek. Nake rohix sa moo, tu cuma baa xlefut, emse hagit, tu pirin tokax sa moo, tu baa piri gala. Pirin gala msian rahek. Tuu nake kepeq Rp2,500 la qei barhadat, hada pemerenta. Pee tuu tamba tu harta geran-geran, ri nax todo-xwali, enhero, pirin, eta polo geran lima. Bu skaraq naa do xwali bu da limpa, todo bu da limpa, rohix bu da limpa, ioro hansiax du limpa. Pee tuu mam egu ior, do rabo-rabo rahek e. Pee tuu du pkehak e harta pei naa, paa da keha pa utun. Barhadax dii toqi bu du pkehax pa rp25,000. Moo do bal-balax do ii sa haan di moox. Pee tuu skaraq naa poo Buru Selatan e do riqe da tamba harta dii pa harta pei utun. Bu fidae Rana bae bageaq gamsaka Licela, wakatin e, Fakal e, do ii sa haan sepe utu di moo. Cuma polrua geran lima rahek. Bu nake emse hagit e tu nake exlefut e, tu nake piri gala dii tetap musti ada. Tuu naa poo du tamba paa roh fah waq konin e, exlefut e, wali oko fnoin e, pirin tokat e, ior di ta, tamba tu harta geran-geran eta utun. Moo do bal-balax da hai rapax latu-pati bal-bal-bal-balax do ii sa haan di moo.