FUTAN.

Futan do la qei baa geba ha di da batotak e geba di nax finhaa di.  Pee
tuu kata "futan" naa, nax arti fene du egu baraq tu baraq tu baraq la du
silih la ana fina di nax geba haa.  Ii ha dii nax qaan fen ma tofo futan.
Ma tofo futan naa, do geba ha di da batotax geba di nake finhaa di, da egu
harta baraq tu baraq tu baraq la d sili la geba di nax finhaa.  Pee tu ha
dii qaan fene ma tofo futan.

Eta ma totax ana mhuka, do moox.  I ha dii sira fene nax geba haa sa
mahede, jadi nax futan sa moo, tu la ku silih la sane, sedaq ana fina
mhuka naa nax geba haa sa mahede.

Eta geba qasmori tu ana mhuka, do ramax tu geba mtuax tu geba mtuax atur
baa la sira rua kaweq.

Bu eta ana qasmori da totax geba nax finhaa, do riqe musi da epsulux baraq
tu nax geba mtuato la du sili la nax geba haa.  Ha du bakaba fen futan
dih.

Eta ana fin falu, do nax futan sa moo, tu ramak e eta ana qasmori, do fene
riqe nax suka ana fin falu dii la sirua kaweq e, do du kaweq.  Eta moo,
poo baa gamdihe rahek e, tu ana fin falu nax futan sa moo.  Ana fina mhuka
pee bu nax futan sa moo.  Cuma baa gebaro nun finhaa.  Gebaro nun finhaa,
do iqax tu musi nax futan.  Futan naa, do ma egu harta baraq tu baraq la
ma sili la geba di nax geba haa.  Pee tuu ma seka fafu, pee tuu ma puna
dame, paa dame tu geba di nax geba haa.  Pee tuu du silir tu hartaro dii,
fafu dii do ma kaah.  Bu ana mhana sili emsikan la ana fina.  Ana fina
sili moo.

Eta ana mhana dii da kaweq toqi, do musi ana fina da hama nax iwagun sa
pii la da egu la geba di nax finhaa psamix toqi.  Bu ana fina sili kuraq.
Ana fina sili do paliq-paliq e nake iwagun saa pii, nax kaleex saa baa
pii, nax labun sa baa pii, ha gam di ta rahek e.  Bu asa bara ana mhana.
Ana mhana da sili et-et-et-et-etaa la qei ana fina di nax geba haa.  Ramax
du kabax rohit e, xwali, esleban e, macaq-macaq.  Sama rahex tu ma basili
ana mhuka dih.  Elek e ma batotax lalen emsian pi lalen rua sa rahek e, ma
sili eta ma bagosox kakunani!

Kalo ana mhana yaq nax finhaa ada haik e la da totax ana fina yaq nax geba
haa sa mahede, atau ana fina mhuka, do cuma eskota baa moo do ana mhana di
nake finhaa da sefen qei ana fina mhuka dih.  Ramax tu da doboh di tohon,
do da srapah pii, da sodih pii, ramax fidi ana fina dih.  Bu harta, do nax
harta sa moo.  Ana fina mhuka tewa da sili la geba ana fina huma xkemax na
moo, tu da rogo akal sa moo, tu ana fina da dapax harta fidoo.