Kami fidae Buru la gebaro la du egu nun ana mhuka, do du paka fafu peni,
du paka tepux peni, la du sohi nun sanato.  Ramax tu faforo dii, du
kamqaax nun sanato fene fafu naa la ya naq sanat eq naah.  Dii biar geba
sa nax keperluaq haan doo bu da tewa kaa fafu di moo.  Ramax tu bama riq
kaa fafu dii, paa geba di nax sanato caano, berarti sir gunih.  Du guni
dii, paa ramax tuu sir paka nun fafu saa, poo sir falqaax fidii fene
Qaagisa, atau Magan.

Pee tuu du paka nun faforo naa, tu nun tepoto naa, do ramax fidi nun
sanato fene da kadux lawe la seka saa, nax perlu pentiq-pentiq saa, ramax
fidi nax sanat.  Atau fene sohi fene egu fina dii teme seka la d kaah,
ramax fidi sira.  Pii sohix fen eta egu fina dii paa ramax la perlu megex
sa fafu popan lalen, bu ramax fidi nun sanax dii.  Asa fafu dii, ejagah la
geba sa bara kaah moo.

Fafu dii mamba da iko, paa da beta geba sa nax suran, do musi kalax nun
sanax dii, la da iko, la da egu nax fafu la da kaah.  Sira te kaa fafu di
moo, tu sira falqaax fene sanat xx fafu.  Kalo sir kaah emhewax fafu dii,
do bageaq di la sira.  Tepux bu gamdihe.  Sohix la sanato dii kaaro.  Sira
te kaar beta moo.  Bu fidae, mam sanat kaah, do da silih lale rua fidi
geba dikax kaah.  Umpama geb dikax kaa fafu dii, mama da silih raran
polrua, do sanax kaah, musi da silih raran polpaa.  Tepu bu gamdihe.  Eta
geb dikax kaah pa raran lima, sanax kaah musi da sili raran polo.

Pee tuu geb dikax sa te kaa teput-fafu di moo, moo do ramax tu emgean dii
la geba etkoriro.