Yako la a dohi exmolix fidae Buru. Fidae Buru la ma xmolik e, do ma xmolix nani amkete, ma xmolix nani inkete, ma xmolix nan bela, ma xmolix nan memlahi, ma xmolix nan wate lahi. Dii yax tewax dii. Nan amkete tu nani inkete, do kita kaweq tu ri nax anat, pee tuu kita bara kaba ana fina kita bakaweq dii nax ama qaan moo, nax ina qaan moo. Eta kita kaba qaan e, do musti ma denda. Ma denda la riqe, ma denda fene ma silih tu katuen pii, ma silih tu xwali pii, pee tuu ka bara kabah tehux mohe. Ada toqi eta nani amkete qaan atau nan inkete qaan dii bex-betah tu namu ii enpunax lea-lea saa, nake qaan, gamna kam nam finhaa qaan pii, pokoxnya ka nam ii laga dape-dapex saa, paa musti ka kaba qaan lea-lea, do ramax tu du safeh. Du safe nax inkete qaan dii. Fen du safeh tu rohix pii, du safeh tuu todo pii, bu du safeh do du safeh tuu ii laga ha-haat e--esleban pii. Pee tuu du safeh dii, pee tuu ramax tuu jaga kabah. Asa du safeh haik. Eta nunu msawan e pu gamdih e. Nunu msawan dii musti du bara kaba nunu msawan qaan moo. Sir te siux nunu msawan bu moo. Tu eta sir siuk e, do sira fene, "Ajabeeh! Geba sa puna naqu huma beeh!" Ramax tu nake emsawan maqarti fen, "Oo, aqa da siux yako aqa ta." Gamdi pee tu nake emsawan e, da te siux beta nax amkete moo. Kalo riqe tu nax amkete defux mua pii riqe tu nax amkete iko emsikan e, paa gamna riqe sax kau luken e, pee tuu nake amkete pa rahe, do riq te kalax fen, "Amkete, egu naq ii..." Riq te kalax gamdi moo, tu riqe musti da prepa fene, "Ajabee! Geba sa egu snapax naqu todo pao da bamoho di," pii, "Geba sa egu snapax naqu e tope da bamoho di," pii. Poo ramax tu nax amkete fen, "Oo, aqa na naqu emsawan siux yako aqa ta." Pee tuu riq eguh. Asa bara kalax nax amkete fene, "Eguh," moo. Dii fidae nax adax dii. Jadi exdakun e do amkete, tuu amkete naa sepu bela. Bela naa do gamna geba dii riq kaweq e tuu geba sa nax ana fina pee tuu nax wali dii nax finhaa, fen nax wali nax finhaa nax bela ha di geba da bakaweq tuha ri nax feta dii. Gamna Oom Joo da kaweq tu geb Buru saa, pee tuu ana fin Buru dii nax nahat e nax finhaa do nax bela di Oom Joo. Pee tuu riq te kaba Oom Joo qaan bu moo, da tewa siux Oom Joo bu moo, da molix Oom Joo. Oom Joo pee bu da molik e ana fina dii qaan--ana fina ha na riq bakaweq tuha nax feta nax nahax nax finhaa, ana fina ha di ta. Dii fidae fen du kaba fen "bela" dii. Doo bela tu amkete tu inkete naa do pupan laleno bu kita te iko pupan laleno moo, sira baptea do kita dihleux fidi sira bu moo, kita bara braqi sira bu moo, kita bara ptea tu sira bu moo, kita bara bage tuha sira bu mooh, naa bela naa. Ixnaat e, do ii la ixnaat e do sintewa la nax lai. Mama nax bela egu lai saa, do bisa paa nax bela fina bisa kaah. Bu eta qaan fen nax bela ana mhana dii da egu gamna ixnaan pii, da egu gamna ii dikat e, ixnaa-xnaax dikat yaq bukaq lai, da egu snapax wae pii, da egu snapax kau, bara! Moo do ramax tu fen ana fina di glaqi. mdii pee tuu inkete tu amkete naa. Nax emsawan e, nax amkete bara egu kau la riqe enhewex bu moo, wae la riqe inu bu mooo, da batewa fen nake emsawan eglaqi. Gamdii pee tu ana fina. Ana fina dii nax inkete bara egu ixnaan la riq kaa moo, bara asux wae la riqe moo, do ma tewa fene ana fina di glaqi. Sedaqkan la memlahi tu anaxnewe tu wate lahi do moo. Asa bara kaba memlahi qaan moo, bara kaba wate lahi qaan moo. Gamna yako naq maman nax nahat, do yax te kabah qaan moo. Atau nax finhaa, yax te kabah qaan moo. Kalo da egu lai, do yax kaa. Da egu... Pokoxnya da egu tenix rahex yax kaa, tu ha dii do aqgap rahex fen ha dii ya naq ama tu ya naq ina di ta. Asa bara kaba qaano moo. Ya naq meme dii riq siux yako gamdoo rahex, yako musi yax turux. Da siux yako tu lea, tu beto, bu yako musti iko, tu yako mtako tu naq memlahi. Moo do ramax tu da naf ute yako, ramax tuu yako dapax susa. Pee tu kami fidae do kami emtako nam memlahi boho-boho. Kam nam mau fene kam nam memlahi dii da bara storix ii sa la kami, ii laga xboho-xboho la kami moo. Moo do riqe storix ii xboho-xboho sa la kami, do ramax tuu kam dufa ii xbohon di ta. Pee tu kami emtako nam memlahi ha di ta. Bu gamna memlahi tu anax newe do moo. Baa bara kaba qaan moo. Moo do molin sa su-suex haan di amkete tu inkete, tuu bela di moo.