EXDISA. Exdisa naa do ma tewa bage tu nani finhaa bu moo. La geba huma xkemax dii, do da tewa bage tu nax finhaa moo. Nax finhaa bage sax humlalen, riqe bage pao rahe. Eta moo do nax finhaa bage humlalen sahex, riq bage humlalen sahet e. Tarabisa la da bage tu nax finhaa. Gamdi pee bu da te foi bu moo. Bara pa i ha barak-raki. Fulan-fulan e da te foi moo. Da barak-raki rahek e. Ha naa do fene ma xdisa. Exdisa naa do la m tufa wae pii ma rogo mua pii, do geba m tua dolo fene ma xdisa. Exdisa naa do nake exmolin e. Exmolin la m bara bage tu nan finhaa, bara foi moo,, bara puni ii laga jaha-jahato gamnaa ma peplum saro bu mooh, eprii laga mkele-mkelex bu moo, tuu nani prii do musti rah-rahet e. Exmolix ioro hansi-hansiak e. I ha aqa fene ma xdisa na ta. Eta ma xmolix ioer na moo, do ramax tuu kita baxdisa bu ma xmolix moo pa geba sa putaih e, pa geba sa bage tu nax finhaa, la kita geba reren dii fene la m tufa wae pee tuu ma xdisa, pee tuu geba sa nax akal boho, paa da tahaq toma moo, pa d bage tu nax finhaa, do heikanane! Bara pa kita nani emloo haa dih! Emloo fulan tam fulan di da bamano di la wae dih! Rugih e! Ma tufa gamnaa, do biar ma tufa tu tufa di empain haan doo, bu wanax sa mata moo. Opofooto du bamidi. Wansohoro bamidi. Bu hansi-hansiak e ma xdisa la eskota la ma bara bage tu nan finhaa bu moo, prii laga mkele-mkelex bu moo, pokoxnya namanya qasmori bu selama dii do da bara midi tuu geba nax finhaa pi ana mhuka bu bara! Do ramax tuu ma tufa wae dii poo waktu la m tufa dii poo ku aqak e wanat mata gamdi sapan, ikan mata gamdi sapan, wansoho mata! Do ramax tuu ma toux nake fuan, do umh! ku seka wanax et-et-et-et-etaa, ku seka ikan e, wansoho! Pokoxnya wae mata eta e geba mtuato fene e, "saha la baksaha! Saha da bapsaha!" Fene, "Tepux telun balulu!" Naa do fene ioro mat sepo. Do ha dii do fene exdisa di nax hasil i ha di ta. La ma rogo mua pee bu gamdihe. La ma rogo mua la ma defux timu pee bu gamdihe. Bara bage tu nam finhaa bu moo, bara midi tu ana fina mhuka sa bu moo. Eta ka babage tu nam finhaa, do heikanane! Watix kae, tuu nam rokor gerano du holix tonal e kaeqan-kaeqan e. Kae an, do ku cuma ku gau baa ton koit e. Du bakaba ii na fen "ton koix" naa do tona breqe saa, mhana saa, da puna emtoken e. Emtoken naa fene da kasi umpama fene ana fina tu ana mhana. Pee tuu ramax tuu ka baol tuha baa nam ton koix dii, pee tuu nam rokoro tewa fen, "O, berarti geba naa riqe bage tuu nake finhaa." Pee tuu nax roko gerano holix tonal tu holix tonal tuu tonal tu tonal e, riqe an holix tonal sa moo tu riq bage tu nax finhaa. Pee tuu exdisa naa, do kalo ma rogo mua do geba-geba skotax nax diri. Fene skotax nax diri, do riqe da holix tonal exdemen e. San pun sala nax diri paa da bage tu nax finhaa pii, da puna jahax tu gebaro nun ana mhuka pii, do rugi riqe emhewak e. Riqe holix tonal an sa moo. Jadi mua do bole esek e. Mua do da baboleh e, tu sa nake sala, do ramax la riqe. Asa bara ma tufa wae ha di qina ya baprepax laqina dih. Ma tufa wae, mam geba msian pun sala, hansi-hansiax, roit-haak e, dapax ii sa mohe-mohe. Bu eta ma defux mua, do bo-boleh, tuu san pun sala dii do ramax la riqe. Riqe yaq dapax ii sa moo. Bu eta geba dii baiix skotax nax diri, do riqe da holik e tonal pii, pokoxnya da dapax fuan e.