EPLULIT. Eplulix naa do geba bal-balax dii da plulix nax rokoro. Gam na yako a suba na Batugaja, pee tuu ba na Batugaja naa geba sa mahed-mahed-mahede suba na Batugaja. Berarti yako naqu neten tu naqu haak baa naa Batugaja naa. Yax suba le-leux na Batugaja, poo ya naqu fena an di qaan fena Batugaja. Pee tuu naq roko megex saa, da iko-iko eta da suba di yako, pee tuu yako xnika fene, "Kae la ku fa door naa?" Fen, "Moo. Ya kadux naa la kita rua pimnaken e." Pee tuu yako fene, "Do gam dii, do ku rogo di yako la ka puna fena Batugaja?" Pee tu riq eruk. Riq erux dii, pee tuu ya egu wae Batugaja, paa a plulih. A srapa poson e, da sekax nax bia lahin saa, da sekax nax mokin saa, pee tuu riqe da rogo fena Gewagit. Pee tuu yako fene, "Eta gam dii, ka rogo haix fena Gewagit e, e ka rogo haix fena Batugaja, yax siux kae la ku ptea di Ponogoro." A plulih sepu, pee tuu geba dii da rogo fena Batugaja tama Ponogoro. Gam dii pee tu geb meget kaduk gam dihe. Da suba di yako, riqe fene riqe la d rogo di yako, do yako plulih tu wae Batugaja gam dihe. A plulih tu wae Batugaja pee, da egu nax bia lahin saa pa d sekak e tu nax mokin lahin sa pa d sekak e, pee tuu da rogo fena Batugaja. Pee tuu ramax yax siux fene, "Kae iko la kae eptea lawe Mardika." Berarti geba dii da rogo fena Batugaja tama Mardika. Gam dii pee tu geb dikax toqi bu gam dihe. Geba dikax kadux gam dihe. Suba di yako, da rogo fena Batugaja. Da sekax nax bia lahin, da sekax nax mokin lahin, pee tuu yako plulih, pee tuu a siux paa da ptea saka Karaq Panjaq, pee tuu qaan fena Batugaja tama Karaq Panjaq. Pee tuu geba tama Karaq Panjaq dii musi da laha geba tama Mardika, geba tama Ponogoro, tu geba tama Batugaja la kai. Gam dii pee tuu geba tama Mardika dii, da laha geba tama Ponogoro tu geba tama Batugaja la kai. Gam dii pee tu geba tama Ponogoro dii, da laha geba tama Batugaja dii la kai. Pee tuu kam tewa fen "Oo, kami naa kakax-wait e. Geba q naa sepo tem geba q naa sepo tem geba q naa." Pee tuu nraqin dofo. Pee tuu kam te raqi sabaraq-sabaraq moox. Bu eskaraq tu naa, do gebaro fi na fukar lawero bae geba fi na Fuk Aboq, do matax si nun kairo si moo, matax si nun wairo si moo, matak e sir nun fenaro si moo, tu sir balah ebuk, pee tuu du tewa ioro q moo. Bu kami fi dae, do kam tewa tu kam nam kai, sepo kam nam wai di i ha q naa, sepo kam nam wai di i ha q naah, hai i ha gam laqina ya baprepax leqina diih. Geba pertama pluli geba dii, pee tuu musti da sekax nax bia lahin saa tu nax mokin lahin saa. Da sekax baa di geba pertama di nax elet. Pee tuu ramax tu geba pertama di reqa fene, "Ka iko la kae eptea baa q naah. Ku kaa neten di i ha q naah." Bu riqe musti da laha geba do a pluli riqe dii, bae da laha geb pertama di la da laha la kai. Pee tuu kami fi dae, do kam nami enraqito dofo tu ior di i ha di ta. Geba kedua te pluli geba moo. Yako naa tama Wahiba. Kami fi di amaro baxdohi dii, do ecuma kam laha tama Erwagix Olon tu tama Erwagix Naqa la kai. Tamar geran-gerano dii kam laha la wair hansiax, tu kami naa do du kabax fene, "Geba kaduk enomor telo. Geba nomor telo yaq kadux di Erwagit."