Ii sa qaan fen "betun," do du tafek e ieqan, eta moo, do wahex tifun,
gamnaa du taho fene, "Betun polo dii ma xdobon, wali," do du tafex i ha
rua, paa geba da baiko dii, da ol tuha saa, sir badefo tuha saa. Pee tuu
gamnaa xkori-sanat iko taho tu nake sanat, pee tuu nax sanat oli gamdii
nax elet, paa da ol tuha e exnaf betun dii.

Pee tuu eta da bage di tohon e, do la msupan da holix i ha saa, paa sisa
fokono cia.

Pee tu la msupan du suba di huma, pee tuu da prepa la gebar di huma di
fene, "Kita nan sanato du taho fene beton  polo dii du hai. Pee tuu yako
efkerex fisaka li betu, pee yax bage di tohon, paa yax holix fokon saa
haix, sisa fokono cia."

Pee tuu ramax tuu betono cia dii, do kau bu du egu pa du xqotox di huma,
lairo fidi huma-huma haat bu du xqotoko di huma, du puna sabua, la du
sohik e nin sanato kaduk.  Pee tuu fen fidoo supan lalen saa du holix
fokon saa, supan lalen saa du holix fokon saa, sepe sisa fokon emsian,
fen, "Supan naa du suba."

Pee la msupan pee du holix pee, iqax tuu lea ha di ta sanato dii musi du
kaduk.  Eta sanato dii du kadux mooh, paa gamna fene ii xboho-xboho saa di
nun sanato dii, gamna geba sa mata, pi geba sa mpei boho-boho, do musti du
siux geba sa la da heka gampao nunu xkoriro fene, "Kam kadux moo, tu nam
geba sa mpei boho-boho," atau, "Kam nam geba sa mata," do bole, tuu nun
sanato du dendah moo.  Bu fene gamna enpeix sa moo, pi geba sa mata moo,
paa gamnaa sir baa nun akal la du balalix baah la du kadux moo, atau
baglidux laleno pa sira kadux moo, do musi du denda.  Du denda gamna geba
dii da siap nax fafor kisin pila, da seka rahex dii, po du kadux po du
kaar moo, fafo kise rua, musi du silir.  Biar sir kaar moo, bu du silir.
Tepoto dii xmatar haix dii, biar du kaar moo, bu sir silih.  Da sili sabua
yaq gebar punah dii da sohix sira ax dii, musti du silih.  Gebaro nun
kaoro, gebar nun tenik e yaq du egoro haix pa du xqotoko di huma dii,
musti du siliro.  Do bole, tu du psuba ana fina dih.  Silir, eta peni teme
atur sakik e fehux pamori.  Hama fafu meget e, puna sabua meget e, hama
geba nax pala, ixnaax meget e, la puna megex minmori sakik.  Da puna pesta
minmori sakix, la du sili pil-pilik fokox saa pil pee.  Fokox an du bakaah
naa, do boleh tu du silih, boleh tu du kaah.  Bu fokox ha di sir bakaah
moo, paa sira kadux moo, pa sir balalix baa pa sir kadux moo dii, do ii ha
dii musti du silih.  Biar si kaah moo, bu du silih, tu adat fidae di gamdi
ta haix teme bisa du psuba anat.  Eta moo, do dapax du suba anax moo.  La
du ol tuha ana fina di moo.

Dii fene i ha na "betu" naa.

Yan says that the knots are not cut from the betun, but that they are
untied, one every morning.