Ana fina banroin fi da Pulau Buru do la bal-balak hede, do anax dii
emlomon dii eta beton polpaa, nax ina tewa kaa tu pir dikax sa moo, da te
kaa hum dikax sa moo, da te suba ax gidan moo, tu bal-balax hede do gebar
gau ii jahato-jahato ha gamdi ya baprepax leux dii fen Maleka Fud Sia, bae
geba kapakex-kapakex ioro.  Do sira fene eta bisux beton polpaa mahede
berarti anat e okon bafaan hede.  Anax meran okon bafaan hede.  Pee tuu
geba sa nake Maleka Fud Sia pii, geba sa nax ii laga jahax-jahax saa, mam
da maix anax meran okon faan, riq kaa anax meran dii.  Pee tuu nax ina da
te kaa sabaraq tu geba sa nax pirin moo, mel da kaa tu geb dikax nax pirin
e, geb dikax kaa tu pirin dii, pee tuu da maix anax meran okon faan, pee
tuu anat an di mata.  Pee tuu nax ina nake pirin pee eta beton polpaa.  Do
fidi sira di fen, "Mohe.  Eta beton polpaa poo difuk e anax meran okon
faan haik."  Poo bisa paa nax ina  bakaa tuu pir dikat e, nax ina basuba
pa da baix pinlehe, nax ina suba paa da bisa da bakarajaa ioro.

Eta gamna du bage emsikan oto hawa, paa geba sa suba dihe mohe-mohe, paa
riqe tu nax geba haa msikan e, paa nax geba haa da gau Maleka Fud Sia na
saa moo pii riq gau ii jahax-jahax sa moo, do bole, tu bisa paa riqe tu
nax geba haa dii bakaa psiax tu pirin pii, nax anato dii bisa bakaa psiax
tu pirin, do bole.  Asal bara geba xdemen, tu ma tewa geba-geba lalen moo,
mele geba sa bagau nax ii laga jahax-jahax saa, do ana fina mameran  naa,
ana fina banroix naa da kaa ledax-ledax, paa da kaa tu geba kagau ii sa
nake pirin, pee tuu geba kagau ii dii da kaa sakix tu pirin dii, pee tuu
da maix anax meran di okon faan, pee tuu nake Malekat Fud Sia dii pii nax
ii jahax-jahax dii kaa anat an dii, paa anat an di mata.

Pee tuu du phaix gamdi ta.  Sepo dihe.