Kami fi dae Buru do kam nam geba mtuato du xbanax kami di ruma saki sa
moo.  Du baxbanax baa kami di huma pteax rahek e.  Ramax tu fina mtuat yaq
biasa du jaga kalax pa da jaga-jaga ana fina kalo du xbana, ramax tu fina
di ta, fina mtua kajaga fina nbanat e, riqe jaga pa sepe anax di jadih e,
do ramax tu riq jaga egu snapax anax di, paa riq manyimpaq.  Da manyimpaq
fi dii, paa sepe anax di jadi gam aq naa, poo eta anax di hage mohe-mohe,
do ramax tu sir egu pirin pa du rekah.  Fen, "Egu pirin e la rekah, tu
anax na hage mohe-mohe!"  poo egu pirin pa rekah.  Rekah pee, anax dii
hageh, poo bisa pa du karjaah.  Bisa pa fina mtua na karjaa.  Eta moo, do
anax di hage mohe-mohe, do sira prepa fene du usaha la musi anax di musi
da hage.  Selama anax di hage moo, eta gehan do satu jaam, dua jaam, do
sal-sala moo do anax di iko spalen.

Jadi anat e musti jadi gam pao musi da hage.  Eta da hage moo, pa eta
bagehan baraq lima miniit sa, rabo pa d egu pirin, pa du rekah, pa anax di
hage.  Anax di hage tem bisa paa fina mtuano dii bisa karajaa.

Poo du fastelak e an roin an di pusen, finaa bole, tu sustero sir
manyimpaq tu nun alat-alat e gosar-gosaro.  Fi dae, do du baegu baa
emnakun, paa du sisih..  Sisi mnakun fi dii, paa du foto anax di pusen baa
tu mnakun rahek.

Pee tuu du du manyimpaq anax di nax kai fi dii, paa ramax tu du werik.

Pee tuu anax dii po bisa pa du foih. Du foih, ramax tu du toux mama anax
dii rahpolox ada, do sira egu nun obato toqi, paa du foih, bu yax tewa nax
ubax di moo.  Nax ina da kaa nax obato sir moo, paa anax dii nax kotor e,
ramax tu sir kalax fene nake rahpoloto.  Moo do mama ana fina katewa ier
dii, paa sir kaa pinegax nun ubato, do anax di jadih gam pao naa, rahpolox
sa moo.  Bersii-bersi-bersi-bersi!

Pee tuu du manyimpaq anat an dii.  Bal-balax do du foih an baa tu ii an
exdefon-xdefono.  Bal-balax do oko rahek e.

Pee tuu anat an dii kalo da molai soso eta gehan-gehan e, du kaba nake
exnabax sa fene "watahik" e.  Watahix naa, do nax geba haa da rogo mua pa
da hama lai fi dii, paa da kasmakaq baa nax ina, pa ramax teme nax ina
sosoh, ehe, anax di soso fi di nax ina.  Nax ina psoso anax di, teme bisa
pa anax di bisa da bakaa gosa.   Jadi anax di kaa gosa lewat nax ina soson
rahek.

Et-et-et-et-etaa anax di eta steqa-steqa taoq labe-labee la d bisa la d
kaa mhewak e.  Bu da bakaa, do da kaa baa midun minan.  Nax anax meran da
kaa, do paliq-paliq da hama baa midun minan pa da kaah.  Da kaa pertama
kali do kaa midun minan e.  Ha di ta rahek e.

Kalo laga ha-ha-haax do bole, sepe da haax do bole, tu bisa du hama tonal
e, fafu.  Bu da te kaa fafu moo.  Hama tonal, do ka hama tonal anan di.
Tonal ana folo xmama har dii do da kaa tonal ana folo xmama har di rahex.
Do exnaan emlosi gosa la anax anan kaah.

Dii kami fi dae dih.  Bu anato sir lagano fidin-fidin, farin-farino fi na
anato fi naa (Ambon).  Anato fi naa, do sir kaa gisi-gisiro, bu aqako, do
sir laga xgolo-xgoloto.  Fi dae, do mnobo-mnoboto, paa ku toux
fidin-fidin, faran-farano.  Anato fi dae dih.

Kalo nax kai, do fi dae do du bafokih, pee tuu du werix oto fogo fafan,
moo do du taqax.  Ma te werix saqabax nax anax nax kai moo.  Fi dae do
kalo sir werix saqabax nax anax nax kai la fosisin hofoh e, do ramax tu
anax meran di te bage toron moo.  Jadi du hama nete maqi go-gosa la du
tahu anax nax kai, la ii sa bara hofoh mohe-mohe.  Dii lian qawen pii.
Paa hama lian qawen la sook.  Fosisin sa bara hofoh moo.  Fokih tu katin
tem fokih tu ieqan, pee tuu sook.  Di fi dai dii.  Te kukax betah moo.  Fi
dae eta kukah, do fene talux anato dih.

Du tedax midun dii, pa d masa teme du pakah.  Dii anat e menan fi dae nake
exnaax pertama-pertama do musti midun minan.  Eta bagehan-gehan tem tonal
anan.