Yusak Tomhisa Selwadu July 1987 A dohi kam ix lata kisi. Yako, Kanando, tu nax finhaa rua. Kam ix lata kisi pao Wabebe. Pee tu ***** nafapaa, paa kam egu nam katupar sia--katupa fuano polo. pee tu kam finaa qei Walaqa, pa kam keha saka, kam kadux sax ox kaku niton saa, oto kandeax. Pee tu kam bage katupa, pa kam kaa. Geba emsi-msian fuan tel-telo. Pee tu kam kaa sepo, pee tu kam logo qei pao Wabebe. Kam kadux pao Wabebe, kam bage pao Wabebe, pee tu kam toho pao Wabebe, pee tu kam bage. Supax-supax gamnaa, Kai Kanando iko patu midun ganaa, paa kam rua tenuk e kawil. Kam tenux fixdae. Fen naa la supax-supak pee tu emloko haa pexbaten saa saqa, pa kam ru helah, paa kam ru xmatah, paa kam rua kadux lau, paa du xmasax--kam tedax--kami ix sabo qei uka, pa kam tedax sepoh naa, paa kam kaah! Kam kaa eeeeta beto rua. Pee tu kam iko fidii fasaka. Kam iko eta saka-saka, tu kam dala. Mohe, yako fene, "Oli la m iko fidae nah!" Sira fen, "Moo. Ma iko baa dae nahe." Yako fen, "Moo. Ma oli fidae na." Pee tu kam iko fidae dii, pa huma tean dii, pa kam lepe tu sakak. Kam loso eta-teta-teta-teta keha ax kakor-kako, walo-walo, kam toho. Kami exmata nami emlokoro polrua. Pee tu kam oli fidii falau, pa kam toho sakix baa la kam wahanam dii, Kai Kanando fene, "Peni la m liqa ela tohon na." Fen, "Eh." Riq liqa tohon naa, pee tu kam lepak. Riqe fene, "Tohon di ii ha naa!" "Eh." Kam sab lepax fidii, eta-teta-teta kam kadux sax uka lahin e. Pee hosir si. Kaintama sir nun hosi baa dihe. Hosi sax uka lahin. Kam kaa eta-teta-teta-teta kam iko fidi fasaka, kam deax oto kau sa lahin. Kam kaa hosi di sia baa di, kami fene, "Hosir naa, eta du newe saa, do la kita. Geb dikax sa moo! Pee tu kam iko fidi fasaka. Pee tu kam bage oto luka lihin sa. Kam puna nam huma saa oto waha. Fidii, bage eta sup-supan pee, kam iko fidi fasaka, kam balepa qei saka kaku roi aan dii, pee tu kam lata kisi. Lata eeeta modan pee, kam toho tu nam kisir aan baa oto waha, pao nam huma. Pee tu eta nam tibir taun e, nam kali haa ha saa taun, pee tu kam reqeh. Kam iko eta kam kadux sakix pao Wabeben. Kami kadux pao Wabebe, pee tu kam bage sakix. Kam bage eta sup-supa, yako fen, "Mohe. Yako toma moo, pa puna baa kalebax ute naux." Kam pali tibi. Yako naq tibi breu-breu aan e. Pee tu a pali tibir aan rua. Kaka nake rua. Pee tu isi sakix. E kam tear eta-teta-teta-teta yako naqu tibi tean e eta la baghidax, la baghidax. Pee tu kami iko fidi saka famahi. Kam lepa eta kam kadux saka, pa kam deax, pa kam pelax kadanam, pa kam logo qei pao sakix, pao Walucafa. Pee tu kami deax baa dii, paa kami mano qei lawe, la kaku tuanani, pee tu kam sohix oto. Oto fidae Kilosambilaq pee--moo. Dani iko finaa fadae, da bakita kami,bu d lea kami moo. Eeeta, kam sohix-sohix oto eta Dani kadux mahi, paa--Danye sir toqi--keha toqi tu sira tu Yopex, tu--Yopex sir fida mqesa. Sir keha, pee tu kami laha pa kam keha, fale nam kisi. Fale sepo nam kisir, pee tu tewa tu Dani sir naa egu nunu fafu mina pexbaten, paa kami iix, po kami teax nam kisir eta sepo, kam iko oto saboqin mintifu, tu da ***** dekax. Fidae Kilosambilaq famahi eta-teta-teta-teta-teta-teta-teta-teta-tetaaa da batoho pao Wakose, pee tu kam tatix nam kisiro, pee tu kami oli aki Wakose, pa kam bage eta beto rua pee, kam famahi qei dae huma naa, pee tu kam bage dae huma naa beto emsian ppee, supan pee, kami iko fasaka, paa kam ix filix nam kisi. Sepu haix. (Transcribed from track 2 of Selwadu boys tape). Yusak Tomhisa Selwadu July 12, 1987 Kam iko mansari, pe tu kam toto feten e, pa kam eguh. Kam eguh finaa pa kam kehax waga, kami tu Rais, tu Sudar e, tu Tos, tu ana warot. Pe tu kam, bu kam tu Gebahena, tu Kobis e, tu geba warot. Pe tu kam iko mansari pao Fatfalu. Kam keha waga. Kam balayar fixnaa fapao. Kam toho pao Wamede, pe tu kam soo nami waga, pe tu wae bae gamnaah, pe tu waga molo! Waga molo, pee tu Gebahena fene, "Waga molo eh! Waga mano! Ras e, waga mano! Waga mano e!" Pe tu kam egu nam ioro, Kobis nake enhero saa mano, nax wani saa mano. Pee tu kam iko balayar eta kam kaduk pao Fatfalu, pe tu kam mansari. Kam mansari eeeta breman. Pee tu sapan e Sudar e tu Toos du hapu prigax kau an saka huma fafan gamnaa, pee tu sira caan, "Humh!" Fafu sa! Fafu! Pee tu du peskeker e Toos nax feta roi an sa, pe tu sira tu Miqgas keha saka! Du komando, pa du keha saka, pa e Besiroi kehmoho, pa lakax parah. Da la d taqi, ***** fene, "E, ku bara taqi! Bara taqi, mo do nam ama oli, da basa ka." Fen, "Ehe. Do gamdii do kim bara dohix mo deh? Bara dohix. Qama oli naa do bara dohix moo. Bahaix gamdih e." Pee tu nax ama oli, kami tu Kobis fiaki pa kam oli. Kam oli gamnaa, tu kam kadux mahi siba emdara fisaka haix, du pili emhunax anat an eq di nax laka oto kelen lahin. Kelen tu wadun tu. . . Pee tu epax lai maqi, pee tu kam pili la kam oli. Sapan e Gebahena naa, nax kawa, paa da te iko tomah bu moh. Ikan raman. Epax kam oli, pee tu yako naa, yax bina fene--***** A batifo, pa a bakerex fisax kaku fafan an! Gebahena fene, "Esi, mo ka bakerex ma pao guhex lalen!" Yako fene, "Mo! Ramax tu yako ha bakerex ma sax kak fafa." "Eh." Eeeta breman-breman, tu kami tu Sudar oli, tu kam tu kai Jet.. Kam oli tu blafen sa, Pe tu yako datak e kehen sa pao ien, pe tu yako fen, "Lae naa lae tohon i na ien hede." "Eh." Du phai-phai gamnaa mo tu babehu kau saqan di, tu yako tu Gebahena nake piri bleke di "doq-daqe!" Yako juqker pao, pa oloq-fohiq, oloq-fohiq.. Gebahena nax piri bleke "kadooq! kadooq!" (enmalit). Mo! Sepo haik!