Samson Waenono Probably 1972 Geba Fenrai. Geba Fenrai da xnogi nax hawa saa. Da xnogi nax hawa saa, lalu da safux feten, da sekax maqat, da tane gehut. Aa, lalu nak hawa dii da mkeda, aa, lalu da iko. Da iko fixdii, paa da prepa la Epkitan Loyawa tu Epkitan Boxmanis fene, "Musun lalen eq nya kita braun. Kita braun la ma kaa flolik e nan hawa qaqan dii, la ma puna huma flolik." Aa ga, kabatage riqe prepa dii, , riq nax akal boho. Ri nax akal boho supaya bisa da xmata Epkitan Loyawa tu Epkitan Boxmanis. Lalu du puna hawa dii, du puna hawa dii sepe feten da boti, maqax bu da xnalit, gehut bu trihit. Aa. Trihix sepu ior dii, aa lalo du braon. Ebraun dii, sio la Pkitan Loyawa, tu sio la Pkitan Boxmanis, sira taga moo. Terus Geba Fenrai prepa la nax wai fene, "Ku iko la ku kalax rahek e Lasax Tama tu Marux Tama, la du kadux la ma kaa hawar qaqano q naa. Peka sira, tu yako, a kalax-kalax sira, bu sir taga moo." Tanik e Geba Fenrai, da siuk e nax wai fixdii, paa da iko pa da kalak e Lasax Tama tu Marux Tama. Aa. "Lasax Tama tu Marux Tama iko la kimi taga lau Geba Fenrai, tu nax masux saa la kimi." Aa, lalu lasax Tama tu Marux Tama prepa la nax anat fene, "Ma iko pi ma iko moo?" Poo Marux Tama prepa fene, "Yako naa, yax iko mehede, tu ya naqu feten sa la ya eguh bu moo, ya naq fua sa bu moo, ya naq dalu sa moo, ya naq ixnaan sa moo. Jadi musti Lasax Tama, ka taga." Aa tanik e Lasax Tama da taga. Taga sex suba di Geba Fenrai, prepa fen, "Geba Fenrai, ka kalax yako tu naq kai, Marux Tama, iqax tu Marux Tama taga moo, tu fua sa la da eguh bu moo, dalu sa bu moo, nax ixnaan sa moo." Aa, lalu Geba Fenrai prepa fene, "Ya kalax la ii xdeme-xdemen sa moo, tu ya kalax rahex la beso kimi kaduk rahex, la ma kaa flolix ixnaano nya, la ma taho fen musu lal dikax saa tem ma braun." Aa, lalu da prepa fene, "Lasax Tama, ka oli dae Marux Tama. Prepa yax lieq fene musti kaduk." Aa, lalu Lasax Tama, da oli suba dae, da prepa fene, "Marux Tama, beton paa naa kita kadux gamdi Geba Fenrai, la ma braun. Kita nani ixnaan sa bu moo, nani iis-ii sa moo, asa ma kadux. Kita tu nan finhaaro hansiax." Lasax Tama oli sex suba di Marux Tama, da prepa fen, "Iqax tu beton paa na." Lalu beton paa di xdeqa-xdeqan, Lasax Tama bu da iko,, nax anax, Manlasax, bu da kiko, Marux Tama bu da kiko, nax anax, Marhuku, bu da kiko. Kiko fixdii, paa du suba lawe, poo du seka fafu minan falale emsika-msikan e, du seka fafor kisin lima. Puna hawa qaqan dii, puna sabua ax gidan e, du hese tu neke omon. Hese tu neke omon, paa du xmasa sepo hawar qaqano dii,, aa, du taho fixdii, paa Lasax Tama tu Marux Tama tu sira rua di nin finhaar rua tu nin anax rua. Du keha fixdii, paa du kaah. Semsuek e Marux Tama, da gau wae pigal boti dii, Lasax Tama da gau wae pigal boti di saa, du pemlemo palex mehede, Geba Fenrai, da suba tu enhero exlawix sa fixdii, paa da liqa fidi hese neke omon, paa da seka Marux Tama na sak e malan upan e sepe enhero xlaux di suba fipao emgimen. Paa da sgifex ba hefen. Paa da oli liq ute saik e Lasax Tama fixdii, paa da tahu snekax di sak e malan upan, paa enhero laka xgoix dihe, da suba fipao emgimen. Paa da sgifex pa hefen. Aa, lalu Geba Fenrai nax wai da xmatan e Manlasax dih. Du pan baa gebar dii nini finhaar, paa du pamatak sepor boti-boti. Du ged laha Marhuku, poo Marhuku heka haik. Marhuku heka naa, da hek taga nax meme lahi naa, Epkitan Loyawa tu Epkitan Boxmanis naa. Poo Marhuku di hekah. Da suba kaku saa, da dafa, da suba kaku saa, da dafa. Da prepa fene, "Kimi exmata Lasax Tama tu Marux Tama, bu Marhuku heka, paa mae oli!" Aa, lalu geba Lasax Tama tu Marux Tama naa, du babage pa hefen naa tu nheror rua na. Du bage pa hefen tu nheror rua naa, Pee tu Lasax Tama prepa la Marux Tama fene, "Kaka o, yako la a trihik e enhero di naux, bu a ksaan aq o, a mtaix moo." Poo Marux Tama prepa fene, "Wai o, yako pee la a trihix nauko, a ksaan aq o, a mtai mo." Da bamtaix mohede-mohede, poo da trihik e enhero xlaux di fixdii, paa Marux Tama ekhaqan di da bapsapa di xlaux di saqan puu. Sub saka fidii, paa da tine Geba Fenrai nax wai da tutux nax tabaku pao bana fidii, paa fahan bacari-carin. Geda mohede, poo Marux Tama, da sadik e xlaux merax di di sak e Geba Fenrai nax wai sahin upan fidii, paa da sek fakak e sahin, paa exlaux di fofon suba fipao hiban goren. Paa da dadak fisaka fidii, paa sira telo bamnehi psiax pao hefen. Aa. Marhuku naa olih. Marhuku na oli sepe da suba di nax memer, sepe musun telo. Musun telo, nax memero du seka fafu minan falaler telo fixdii, paa nin anax newe naa, Marhuku naa, da kaa. Kaa, sepe da kaa sepo, peo Geba Fenrai da iko di Pkitan Loyawa tu Pkitan Boxmanis, fene, "Wali o, soal e Lasax Tama tu Marux Tama abis sepu haix, pi ka baunax hede?" Pkitan Loyawa tu Pkitan Boxmanis fene, "Wali o, ma unax iero la ma pun sapan tehux, tu masi panu, wae pan ier di haix, poo ma unax la sapan?" Aa, lalu, aa Epkitan Loyawa prepa fene, "Kalo bam ma unax tehux mohe, do ka namu ana mhuk haa sa ma dii paa ya naq anax newe na safeh." Bene, "I ha dii, do betono pito di ku hai, nam anax newe Marhuku hai la da pili fene nax suka riqe exdoo, do da def baa tuha. Bu ya naq anato la ol tuhar, do moo. Ol tuhar la du oli gamnaa, do moo. Sane la da kaweq tuharo, do def baa di ya naq negrii, do bole." Bene, "Bole, bole, wali, asal e saa!" Aa, lalu Marhuku di hai sepe da suba di Geba Fenrai nax negrii, paa da touk e ana mhukar pito naa, nax suka baa msian. Aa. Nax suka Geba Fenrai nax ana mhuka naa, lalu da ptea ba ax di bek. Da ptea ba di be et-et-etaa da karajaa Geba Fenrai nake exneiro empunano, da karajaa et-et-eta sepe da ptea musun telo. Da ptea musun telo, da saki di nax memer. Fene, "Meme, gamdoo tu Lasax Tama tu Marux Tama fnokino hede pi mohe?" Fen, "Moo. Skaraq naa nipik e nim pembalasan efnokin na ta!" Aa. "Ku egu baa naqu siwi emsian eq nya, ku oli tuha dii,, e beton pito di tem nipi yax hai.. Ku oli tuha di Geba Fenrai nax negrii, ku sala siwi naa tfakan pito, do beton pito dii ku pefar lalen pito." Aa, lalu da oli tu siwi dii, da suba di Geba Fenrai nax negrii, aa, lalu da sala siwi dii paa etfakanor pito. Tfakan pito dii, da pefar beton pito, da ba--beton nee, da pefa nee. Sampe beton pito dii,, da iko pao wae, poo nax meme rua di pitaqo, pa i har di haik. Fene, "Gamdoo, tu beto qina naa, kami emtaix pi kami emtaix moo, musti kam kadux uteh e. Ku pefa selek emsian." Aa, lalu saka sepeee du wana-wana la hisi la mhawen dii, da pefah e. Sepe la bex tifu, da touk e, Geba Fenrai naa, da bage mohe-mohe. Da saki pao wae. Fene riq fukan empei, pa d saki pao wae. Da prepa fene, "Geba Fenrai, iqax tu da te bage moo, tu saka naa riq bawana." Ben, "Do ku egu naq lahit e espala nya, ku pefa, bu lama da bage mohe, do iqax, am, tu ku bara flale xboho kon, am, tu iqax tu sepe ku ba-e-emkeda baa ba ax na bex, tu yako tewa a foli Lasax Tama tu Marux Tama nin olo mohe, tu a mtaik e Geba Fenrai moo. Bu lam da bage, do a kadux saka, tu a mtaix." Aa, lalu da oli, paa da egu lahit e etfakan dii, da suba saka, da pefahk. Da pefah pee, Geba Fenrai dolax, paa da bage. Da bage dii, da luqak e niboti fuan saa. Pee tu olon tola fidi niboti fuan dii, da prepa fen, "Mmh, mmh, aa, Marhuku, a bapemsawa ka, bu a touk e leqina naa, a toux tanda xbohon! A aqak e Epkitan Loyawa tu Epkitan Boxmanis e du taren eq tola kau fua fatan eq dii, paa du phamax qaaq fene, 'Geba Fenrai, ka bag haix pi ku bawana? Gamdoo tu e Lasax Tama tu Marux Tama fnokino hede pi mohe?' Katefen e a kita sapan fixdiih? Tanik e a sub tu bakmiten di fidii, paa a tufak fasak e faha tuf-telun dii, paa bakmiten dii depah, paa tepanor telo! Katefen sapan fidii, Marhuku?" Ben, "Am o, ii dii, am o, memaq setan saa ninu ka. Betu fen ii bexlean saa da subak e nya moo. Bu betu fen moo tu ii bexlean sa subak e nya la da xmat kae, am o, ramax, am, tu Marhuku gar suba am, paa ahek e fokit." Aa. Da prep sepo gamdii, pee tu da tine, poo Geba Fenrai dekex-deket haik. Badekex-dekex mehede, peo tepoto kalax. Tepoto kalax, pee tu Epkitan Loyawa tu Epkitan Boxmanis e du kadux. Du kadux fixdii, paa du taren e nak tola saxmenax di. Du prepa fene, "Geba Fenrai o! Ku bag haix pi ku bawana, tu Lasax Tama tu Marux Tama du mata musun pito, nipik e leqina naa, efnokin pi fnokin moo, bu nax wali rua du ik hamah!" Lalu du sgedax gamdii, poo geba Fenrai dii gamafukah fiaki tu baxmiten di fidii, paa olon fuka di nax faha di fidii, paa faha di gamafasah paa somono rua, pa d suba sax huma ilan. Da suba sax huma ilan fidii, paa da koi fisax huma ilan, paa da pana dae rahe. Da pana dae rahe, da pana ba-baak e Epkitan Loyawa, tanik e da tahu kehex di di sak e malan e eptedan sepe da sasa pesnaih paa eqan rua. Da skoi kaeqan di fi kahan fidii, paa da tokah e. Da skoi baxmiten fi kahan, pa d tokah, pa eqan rua di oli, paa da psuni, pa d kema. Paa da sikak e rep-neet. Da sikax rep-neet fidii, paa e Epkitan Boxmanis e da ha uteh fidii, paa da xnatak e olon e fidii, paa da pteak e olon megek e. Ekfakak e eqan rua di fidii, paa du paha psaman. Aa, lalu di ta poo da xmatah e. Aa. Marhuku, da panax baa gebar dae huma lalen di fixdii, paa da seho seporo boti-boti sampe sehiqga da oli nax finhaa sampe nax anat e, da lalah fidi xlefux fidii, paa da xmatah. Da sehuh. Sepe negri dii humar kodono ksia dii, du panax baa gebar dii sampe sehiqga du seho seporo, lea din-dinan. Aa, pee tu baraq bu du lef putak sepu boti-boti. Aa, du oli, Lasax Tama nax anat e Marhuku dii, da prepa fene e, "Skaraq leqina naa," (da fedak fahan gamsax Opo) fene, "Leqina naa, iqax tu yako a ganti naq ina, a ganti naq wair, a ganti naq amaro, a balas sepu i ha naa, yax oli, mel dosa sa la yako moo." Aa, du oli suba di Epkitan Loyawa tu Epkitan Boxmanis nax huma, aa lalu du seka fafu saa, du xmata tepo fatan rua, paa du puna meja, paa e du kasmakaq e e Geba Fenrai nake e barhalar-barhalaro, tu du salolo. Du kasmakaq e Geba Fenrai nake pujir-pujiro, tu du salolo, tu gebar tehux mohe, du prepa fen, "Iqax tu meja q naa, dosa naa, iqax tu bukan dosa naa la yako moo, tu dosa naa Geba Fenrai da xmata ya naq ama tu naq ina tu naq wairo samaskali, jaji yako a alak e Epkitan Loyawa tu Epkitan Boxmanis, naq meme, paa du balas dosa naa, iqax tu dosa naa be da braqi yako moo, tu sira du xmata leux kam nam ama, du xmata leuk ya naq ina, ya naq wair naa, nipix nax pembalasan na ta." Jadi abis. A, abis. (Transcription completed 2/29/88 by Joe Devin from track #1 on Samson tape).