Ana Mhodo Kirax Fafan
        By Mukabui
        Selwadu
        July 14, 1987

Geba saa tu nax finhaa tu nax anat an emsian.

Du kehax nun waga fidi masin,
du iko dae kaku fidi mua loso mua, eta du suba oto geba nun negri tean ganaa
ta, pee tu geba bohox.  Sir telo keha di kirax.  Kirax dae kaku, pa du puna
nun huma saka kirax di olon fafan.

Pee tu nax ina siru nax ama jaga iko xnaka
geba negrii dii nunu ixnaano fidi hawa.  Du xnaka geba nagrii di nunu ixnaano
fidi hawa lea-lea-lea-lea, eta gebaro oto uteh.  Nax anat an badefo di kirax
di.  Du oto ute nax ina siru nax ama fixdii, paa du xmataro.  Geba nagriir di
oto, tu du xnaka lea-lea ixnaan di hawa.

Pee tu du oto uteh fixdii, paa du
xmata nax ina tu nax ama sepo, nax an sohi et-et-et-et-etaa beto: watiro! Qina
siru Qama, naa do du fadoo naa, do gebaro xmatar haik, tu du jaga egu geba nun
ior.

Ian sohi-sohi et-et-etaa du oli tagah an tehux mohe, pee tu gebar fili
nagrii dii sia iko pteak e nex menet e. Du ptea xlodi, paa du ix tapa beta baa
di sira bapelfoni di kirax dii tea.  Pee tu lea-lea dii ian exnoko.  Da kita
beta gebar dii, pee tu ian exnoko, da aqax gebar dii, geba mnegar iko sepo pa
du ix liqa nun surano, ix liqa nun uneto, pee tu ian aqak e geba roir an di
badefo emsikan.  Pee tu ian suba fixdii, paa da midi di nax taor an di.

Midi
di nax taor an di etaaa du xmasa pa du kaa, du laik en roin tu ixnaan pa ian
kaa dii, emhawe-mhawen da aqak e geba di nunu amaro tu nunu gebaro di oli, pee
tu ian hekah.

Ian heka oli sakix, paa ian bage di sir nun elex di kiran fafan
di.

Pee tu lalen saa gamdihe, lalen saa gamdihe, pee tu geba roi an di xdohix
qei nun ama.  Du iko sakix tatakon, pee tu ian suba dih.  Nax rokoro flali
taxbuan dii, paa lien.  Pee tu ian hai fixdii, paa da oli sakix suba nax rokor
an fixdii, paa du flali taxbuan di, tu ran midi, tu--eta lea dae-dae, tu geba
mnegar oli.

Geba mnegar oli, pee tu riqe an d hekah.  Da heka, paa ian heka
oli sakix qei nun elex.  Do ian kaa uhan haix fidi nax taor ano.

Pee tu du
dohix qei nax ama fene, "Kam nam tau an saa suba naa, do nax ina sa mohe, nax
ama sa mohe, tu da bina fene difux nax ina siru nax ama exnosin haix, paa lae
gebaro xmatah.  Pee tu riq an jaga iko fana kami, paa kim ix tatax kami dii,
do kami an di jaga midi etaa ian oli haix."

Pee tu nax ama fene, "Do ian oli
haix, do ian oli fadoo?"

Fen, "Tewa, tu ian buji kami, pa d heka, paa ian oli
qei nax elex dii da baexdohix nax ina tu nax ama mata haix dih."

Pee tu nax
ama kastau sira an sakix fene, "Eta ian saki suba naa, do prepa qeih en fene,
'E, kita an manaa beka, tu ku bara mtako, la ku an bara oli qei emsikan di
elex di beka,tu kita an manaa.  Eta nam ama si nam ina mata haik e, do qama
prepa fen moo tu kam ix oli la ku polox kami.'"

"Ehe."

Pee tu du kaxnauk en
sakix,pee tu ian iko moo.  Geba di oliii, pa grukeno, pa du oli tu nun lairo,
ian heka tehux moo, tu ian eptea ian bacikek e.  Ri nax rokor an pese sueh,
fene, "Bara heka,tu qama xmata kae an moo.  Tu barisux la kam puna nam wai an,
la kita oli qei kam nam huma, tu nam ina siru nam ama mata haix."

Pee tu
sepuh.

(Transcribed 11/20/87 by Joe Devin from track 4 of Mukarehet tape 1).