The following tale told by Mesak, Selwadu, late 1972: Potria Luqi Lalen. Yako la dohi Abunawas. I will tell of Abunawas. Abunawas da defo, nax kepeq sa moo, jadi da safe gula bu da te safe tu ii sa moo, da safe hale bu da te safe tu ii sa moo, pe tuu da ptea dii, nax fikiraq dii, da leli sakik. Lebebae da iko egu dodeso wihin la da iko dadik. Jadi riq fikiraq dii fen nax lalet fi aki dii yaq da prepa fen da dadik dodeso, da hama qei fafu, da hama qei mejaqan. Aa jadi riq dadik nax dodeso dii, da dadik eta da dufa raman utun telo. Da dufa dodeso raman utun telo, da seka fafu, da seka mejaqan, pe tuu da loa dendeq. Da loa dendeq, pa d maqi. Dendeq dii da isah tu sasi pa d maqi eta da maqi sepo, pe tuu da toho paa da kfilik. Da toho paa da kfilix dii, da loa nak huma breu-breut saa taqada tuu Bapa Raja nax huma. Jadi riqe ekfilix nax dendeqor dii, gebar safe. Eta da kfilix dendeq baa di Bapa Raja nax samena dii lalenor telo. Bapa Raja ptea paa da pikir: "Akeba! Geba naa da kfilix dendeq taru-taruus naa, do da dufa tu tenix naa?" Da kalax riqe. Da kalax riqe fen, "Kae jaga kfilix dendeq eta xdeme-xdemex naa, doo kae dufa i har naa tu tenik?" Fen, "Yako kfilix dendeqor naa exdeme-xdemex naa tu ya naq asu. Naa yako naq asu msian baa. Nake esnaqax wahan na ta." Jadi riqae eprepa la Abunawas fene, "Kalo gamdii, do bisa yak pinjaq ka nam asu pi moo?" Fene, "Beta moo, Bapa Raja. Kalo ka pinjaq ya naq asu, dii ya naqu xnaat tu naqu npakex dii haqsiak ya harapan fidi naq asu rahek." Jadi Bapa Raja prepa fene, "Mohe. Ku bara mtako, tuu yax pinjaq, kalo asu mata pii, difux pii, yax silih." Riqe prepa fene, "Jadi mox. Biar kae silih, tetapi yako kaspinjaq kae tu naq asu mox. Ku sohix baa la ya naq asu saqa majaqan tu du saqa fafu, yax puna dendeq, la yax toho rahex, la yako xfilix la kae." Riqe prepa fene, "Mohe. Kalo eta yako safe taru-taruus fidi kae, ya naq kepeq sepuh, jadi musti yako kaspinjaq ro-roin. Ku eruk la yako kaspinjaq la yako tu negrii oso la kami maqusir. Jadi kam oso la kam maqusir dii, bu ramax tu yak sewa fidi kae. Ku kaba sewa lea taun emsian pila." Riqe naa da ptea paa da pikir: "Moh. Yako tewa kaspinjaq beta asu moox." Jadi sirua plawan. Sirua plawa-plawa-plawano naa, Bapa Raja da prepa fen, "Mohe. Yako a sewa ka nam asu tu satu juta." Da prepa, "Jadi moox! Ka sewa tu ya naq asu tu satu juta jadi moox. Skaraq kalo ku iqin ya naq asu, nam sukah butul-butulu dii, do nake esnaqax wahan dii kita rua bageh." Bapa Raja bina, "Boleh. Kalo eta kae tu yako bage asu nax noro bole saja. Asa beton pila yako sale asu ba naa?" Bapa Raja prepa qei riqe fene, "Sudah. Beto rua dii yako sale aso ba naa yako naqu huma lalen." Aa jadi Abunawas naa da pikir: "Kalo beto rua baa berarti riqe dufa asu sa moh." Riq bina, "Sudah. Bara beto rua. Yako laqgar kae. Beton lima. Beton lima dii yako pahux asu." Eh. Sirua pes sar faha sepo, Abunawas oli fadae, da iko egu eblafen duman. Blafen duman dii pa da da dadix dodeso. Da dadix dodeso oto kaku xnitan, oto kamyoho na mbuan-embuan. Da dadix oto mbuan dii, da holik emsian. Holik emsian gamaqnaa, da hapuh. Hapu eta da hapu sepuh. Hapu fifin, da hapu kadan, hapu fahan. Da sgerah. Da suba lawe Bapa Raja, da bina, "Bapa Raja, asu haix. Ya kadux tu asu na haix. Jadi ya naq asu naa, Bapa Raja, da tewa ine beta pa rahe moo. Asu naa musti geba sgerah. Halae. Dan asu naa, bara holix takaruaq riqe moo. Biasa yako geba duan jua tetapi ya iko na musti yax hapu riqe, tu yax suba oto binataq wahan baru yak holix gos-gosa, baru ya lapaas. Aa yako caan dii, hine cuma fafu pii--da dufa fafu pii--da dufa majaqan pii, caan iqan dii da keha saja. Kalo da laun, yax taga sekah. Jadi yako perhatikan kae, Bapa Raja, kalo ka loa ilaq ya naq asu, pi kae exmata ya naq asu, tetaap kae silih mampu moo, sebaap ku toux rahek, fi na beton pila sa lalen naa ka safe majaqan taruus, ka safe fafu taruus, karena asu naa nake esnaqax wahan." Jadi Bapa Raja da flali tuba. Bapa Raja flali tuba, da kumpul rayat haqsiak, da bina, "Skaraq yako pinjaq Abunawas nax asu, halae. Beto taun emsian gebar polo geran rua du defo la du sgera asu. Saa sgerah eta pei fahan, da tuke sakix laha geba dikat. Saa sgerah eta pei fahan, tuke sakix laha geba dikat. Abunawaas naa da kaa tuha da ino dii--du loa ixnaan gosa-gosa qei riqe, jadi riq kaa eta uhan-uhan. Da janji qei Bapa Raja, "Halaek yako naq asu ilaq beta moo." Jadi Abunawas naa riq da loa bodo Bapa Raja naa, tewa moo nax suka Bapa Raja nax ana fina mhuka msian rete loqin lalen. Aa jadi supan-supan sira iko. Du iko eta du suba ax mehe kakun emsian, da bage nake geba roito dii pa du jaga boli-boli. Riqe da kerek oto kaku xnitan dii, oto binataq wahan, baru da kerek pa da holik. Holix leux kamyoho nii fahan, bisu da holix kadan, baru da holix fifin, baru da lapaas! Jadi kita hansiak ma tewa kamyoho naa, ien dii bukan ien mahut. Dii i emlahat. Da kita beta geba, da heka eta laha da mdao nax diri! Jadi Bapa Raja holix gamaqnaa, kamyoho dii laqsuq da loso mua dii, da loso taruus! Da loso taru-taruus! Jadi Bapa Raja naa da sohi-sohi-sohi-sohi, ei! Fafu saa da laun moo, majaqan saa da laun moo. Nax geba roito jua bu du sohi et-et-etaa lipoton bisur et-et-etaa kolino dii murex-murek! Hah! Du leli taga Bapa Raja. "Gamdoo? Asu naa da saqa moo!" Bina, "Tuqgu! Yako a sgaeh riqe oto fafu wahan, majaqan wahan, ha jadi tunggu!" Sira tuqgu-tuqgu-tuqgu-tuqgu eta lea da oso kaku. Heh! Kasiaq! Du bina, "Kasiaq kae, Bapa Raja, karna naa Abunawas nax asu naa di eta difuk ma mampo silih moo." Dae, sira oli. Du oli suba ax huma, Abunawas (da tewa haix!) da defo sohi haix. Serta Abunawas da kita, da bina, "Bapa Raja, gamdoo ya naq asu? I ha fidoo? Yako mau pakah." Riqe basgerak ixnaan tuha piriq. "Yako naq asu fidoo? Yako mau pakah." Bapa Raja di bina, "Asu difuh haix." Da bina, "Kasiaq, Bapa Raja! Yako tewa naq asu difux moo. Yako naq asu dii ta oto. Yako harap naq asu ta oto. Yako ekrei, ya bina kae egu ya naq asu moo. Tapi kae bina kae egu asu, kae taqguqjawab. Jadi yako a tarima kepeq moo, a tarima ien dikat sa moo. Skaraq yako naq asu holik." Bapa Raja ptea, da helahaih. Jadi Bapa raja ptea naa, da pikir, da tewa kaa beta moo, da tewa ino beta moo. Nax finhaa da nei ixnaan, tapi jadi moo. Lalen takaruaq tu Abunawas nax asu. Aa supak-supak paha tuba, geba utun telo keha hamah. Hama asu eta du hamah, eta lea di da oso pao kaku, dufa asu moo. Oli. Bina, "Abunawas, skaraq kami dufa asu moo, jadi kae nam suka tenix? Coba ku kabah pa sepe bisa kami silih, sebap memaq yako tewa kae nam asu da saqa. Fafu, majaqan--yako safe taru-taruus fidi kae. Memaq yako tewah. Kae nam asu memaq kae nam keuntuqan, kae nam untuq. Nam hidup dii da newe oto kae nam asu. Skaraq kae kaba tenik?" Riqe bina, "Bapa Raja, skaraq yako a sale kepeq moo, a sale harta moo. Skaraq yako a laha fen naq asu oli saja. Sebap kepeq, harta, kae nam baraq mati, tapi ya naq asu ya naq baraq mati. Jadi skaraq da oli la ya naq asu oli saja." Jadi riqe eprepa la Bapa Raja, "Bapa Raja, kasiaq! Kalo kae xdifu ya naq asu, berarti ya naqu xnaax susah, naqu npakex susa, jadi a tarima kae nam kepeq moo, ya tarima kae nam harta moo, sebap harta kae namu baraq mati, kepeq kae nam baraq mati, jadi skaraq ya lahak naq asu oli, supaya bara loa susa yako moo, yax bara loa susa kae moo." Bapa Raja da ptea dii, da pikir. Da bina, "Mohe, Abunawas, skaraq kalo kae nam suka kepeq tiga juta, berarti yako sili asu kepeq tiga juta." Abunawas da bina, "Mohe, Bapa Raja, kalo eta kepeq tiga juta, yako a krei butul-butuluh. Yako a lahak asu saja." Bapa Raja da defo lear telo betor telo, da lomo Abunawas tu asu filin. Etatetaa Bapa Raja da toma mohe. Bapa Raja da bina, "Sudah, Abunawas, skaraq kae ekrei kepeq, kae ekrei harta, skaraq yako a sili kae nam asu mhei tu yako naq ana fina msian. Ka kitah haix pi mohede?" Aa Abunawas naa da loa pura-pura Bapa Raja. Abunawas da bina, "Mohe. Skaraq kae nam ana fina, tetapi da dufa mejaqan moo, kae nam ana fina dufa fafu moo, la ya kaa moo. Jadi lebae yako kasmakaq kae nam ana fina bole, tapi ya dufa fafu moo, ya dufa majaqan moo. Jadi yax laha asu oli." Da bina, "Moo, Abunawas. Skaraq gamnaa. Bara kae emtako moo. Kalo kae kaweq tu ya naq ana fina, sepu kae nam asu filin. Kae sili ii sa tehux la yako mohe. Jadi dii ya laha kepeq sa fidi kae mohe, ya laha baraq sa fidi kae mohe, tu cukup tu asu filin. Jadi bara mtako moo. Skaraq yako sili kae nam asu tu yako naq ana fina, Potria Loqin Lalen. Aa jadi yako egu Potria Loqin Lalen la kae, skaraq kalo eta kae sadar la bisa kae ampoq yako tu nam asu, kae kaweq tu ya naq anat, aa skaraq kae defo ganti yako na huma. Skaraq yako toho fidi raja, kae jua prenta sakix raja sakik." Riqe da, "Mohe!" Da xrei! Memaq da tewa dii karna nax iqin fina naa, tapi riqe pura-pura xrei Bapa Raja hede. Bapa Raja bina, "Mohe. Yako a lahak fidi kae kaweq tu ya naq anat." Abunawas di bina, "Mohe. Yako kaweq beta tu kae nam anat moo. Skaraq yax sea asu." Da bina, "Moo, bara mtako! Kalo kae kaweq tu ya naq anat, tetaap kae nam asu filin dii yako potoq saja tu ya naq anat. Kae sili ii sa la yako moo." Aa riqe da lahak lalen telo, da xrei lalen telo. Aa skaraq pao mori memaq riqe nax suka. Riq bina, "Sudah. Kalo gamdii, kae emhesek yako ka ya kaweq tu kae nam anat, skaraq kae loa surat emsian, musti kae tekeq. Kae tekeq, haqsiax negrii tekeq, paa supaya yako kaweq dii, tetap yako kaweq bebas. Pesta, yako loa pesta mohe, nama sapan yax taqgoq untuk kami rua nami kaweq dii, yako a taqgoq eta msian moo, karna ya naq asu filin tirin! Filin haa! Jadi skaraq yako bebas. A taqgoq nama segala naa, yako bebas. Kae tu masarakat haqsiax taqgoq." Aa, "Bole, kalo kae erux gamdii, karna naa kesalahan kami haqsiak. Kami kampoq taun kesalahan." Jadi skaraq Bapa Raja da loa surat. Flali tuba gamaqnaa, masarakat da taga sepo, riqe da psara. Psara mribe-mribe la masarakat. "Skaraq yako kaskaweq Abunawas tu Putria Luqi Lalen, yako laha kepeq eta matan emsian moo. Jadi skaraq riqe da kaweq naa, yako a sili asu tu yako naq ana fina, Potria Luqi Lalen. Jadi skaraq kimi geba negrii taun haqsiax, kimi setuju pi moo?" Negrii taun da sade Bapa Raja, da bina, "Sekaraq kami setuju." Aa sira sgeda "setuju" lalen telo pee, Bapa Raja da puna surat tekeq pernyataan terhadap Abunawas. Abunawas pee tekeq. Jadi riqe kaweq bebas. Aa sepu dihe.