Geba-waha-kau-nodo,
        By Mei Nurlatu,
        April, 1984.

Pee tu lipoto wala kon-konix, deka wala kon-konit.  Iqax tu
Geba-waha-kau-nodo oli di ta!  Tu da huda nax roko, Geba-hiba-karan-siku.  Tu
nax lebin rua, tu nax kaeqan.

Geba-waha-kau-nodo suba dii, paa da xnika
Geba-hiba-karan-siku fene, "Geba hiba-karan-siku, ka wana haix, pi ka babage
hede?"

Emtoro.

"Geba-hiba-karan-siku, ka wana haix, pi ka babage hede?"

Emtoro.

Da xraax lalen telo, teme dike Geba-hiba-karan-siku fix dii, paa bifrikex fi
pao humlalen fix dii, paa bifrikex sax huma ilan, paa da tatix lebin rua, tu
nax kaeqan.  Nake kaeqa uba xbakit.  Fi di tu da pana ax gidan.

Da pana ax
gidan, da bapana bex-beta Geba-waha-kau-nodo.  Da tatik e nax kehex tu nax
kaeqa uba xbakix, tu nax lebin rua.

Sira rua epsisan tu eplatat.  Sirua
epsisa-epsisa-epsisa-epsisan tu  Eplatat!  Tu Geba-waha-kau-nodo fene,
"Geba-hiba-karan-siku, ku ptane, la a lat hama kae!"

Geba-hiba-karan-siku
fene, "Ka eptane leux, la ya lat hama kae."

Sira rua eplawa-eplawan,
Geba-waha-kau-nodo fene, "Geba-hiba-karan-siku, ka eptane, la ya lat hama kae
leuk!"

Riqe fen, "Moo.  Ka xraax fohax yako,Pa ka eptane leuk, la ya lat hama
kae!"

Fen, "Ehe.  Gamdi, do, ou, ku jaga!  Ku jaga, tu a lat hama ka!"

Geba-waha-kau-nodo da ptane, paa Geba-hiba-karan-siku da lat hamah.  Da
eptane, paa wae leo mohe!

Suba dii,Pa da ninuh tu kehet dii, tu lebin rua di.
Da seh tatak.  Da ninu lalen telo, da seh tatak.  Da aqak e, qisi sa mo, fefa
sa mo.  Da eptane sepe wae leo mohe!

Di, da saki di pa d riah.  Da riah tu
kehex di.  Da riah gamaqna, da kitah mo.   Da kita nax todo iko mo.  Da latah
pal-pale.  Da lata pal-pale, da aqak e, Geba-waha-kau-nodo da jaga di todo di
bafilan.  Da pitix lalen emsian gamaqna, nake kehex maen efruru.  Nax todo
maen bakah, paa da ba keha emkele-emkele, da bagao ba tinan.  Da prepa fene,
"Geba-hiba-karan-siku, nam todo maen e bifrukex haik."  Tu da prepa fene,
"Todo maen bidi haik.  Su ku ptane pe, la ya lat hama kae pe."

Resek,
Geba-hiba-karan-siku da sehe fi dii, paa da ptane.  Pee tu di paa da ninuh
lalen telo.  Fene, "Ka namu eptanex di i ha dih?"

Fene, "Ya naqu eptanex di i
haq nah.  Fidi epkita lata epkitan e, ya naqu eptanex di i haq nah."

Fidii,
paa da ninuh. "Geba-hiba-karan-siku, ku ptan pilih peni!"

Da sehe fi dii, paa
da ptan pilik.

Iko dii,Pa da ninuh.  Fene, "Ka namu eptanex di i ha dih e, pi
ka namu eptanex di sa hede?"

Fene, "Yako fidi epkita lata epkitan e, naqu
eptanex di i haq nah!"

Geba-waha-kau-nodo fene, "Geba-hiba-karan-siku, ka
sohix yako gamdi mo.  Ka sohik e Geba-waha-kau-nodo gamdi moo!

Da sehe fi
dii,Pa da ptan pilik.

Geba waha-kau-nodo hai suba dii,Pa da ninuh.  Fene,
"Geba-hiba-karan-siku, kae eptan sohik e Geba-waha-kau-nodo gamdi moo!"

Fen,
"moh e, Geba-waha-kau-nodo, ku puna, do ku puna, tu yako fidi epkita lata
epkitan e, naqu eptanex di i haq nah.  Ku puna, do ku puna, tu a eptan tehux
fi na moh e."

Geba-waha-kau-nodo da siba emkaat fi dii, paa da latah dae!  La
da bapisnira nax todo gamaqna, Geba-hiba-karan-siku nake sepe bapaqen di nax
wae-exdaban.  Esnain rua ba baefkaka.

Fene, "Yako prepa fene eptan pilix peni,
Geba-hiba-karan-siku!  Yako prepa fene eptan pilix peni!"

Poo eqan rua
baefkaka, pe tu i ha matah.

Pee tu da egu nax lebin rua dii, tu nax kehex mae
exbidin.

Pee tu sepuh.