Mama Eci Behuku Labenu 1:08 P.M., May 23, 1988. Betu balak e na Fux Buru, neten sa qaan "Tifu." Neten dii, nax raja ma di ta toqi. Nax raja dii, raja Behuku. Di neten dii, di Tifu, geba mtuax saa, lalen boho. Rine tu nax finhaa, tu nax anato defo di hum hawa. Defo di hum hawa, beko lalen saa geba mtu lalexbohon dii, da sefen tirin e, beko da phuda, tu da bagau katuen. Beko nax finhaa tu nax anato toux da phuda tirin e, du heka fixdii, paa du pefroni. Hex lepak e, hex logok e, du tewa saro tehux moo. Nax ina heka megex, nax anato heka megek e. Nax anax sa naa, da heka, da heka-heka, pee tu da dapax kau lahi haax saa, pee tu da pefroni. Kau di bodih, pa da pefroni di kau di kolon. Pefroni fixdii, tu tewa moo, nax ama hai betah di kau di kolon, pee tu nax ama ptureh tu katuen, pa d mata. Pture sepo nax anax dii tu katuen sepo, nax anax dii mata, griax lalen e, da tewa tu da xmata haix nax anax dii. Beko da oli gandi huma, paa da taho katuen e, nak finhaa tu nax anato oli di huma. Du aqax, moo, nak finhaa fen gemtuax na basa haix nax anat saa, tu ha aqax katuen na rahan. Beko nax anat saa ha kalax gamaki fena. Heka ax fena, paa ha kalax paa Bapa Raja Tifu. Bapa Raja Tifu tu nake kapala soaro, nax marinyuro, du keha gamak hawa, paa Bapa Raja Tifu naa, da xnili nax iero biri-biri, paa tor gamk hawa, beko dena aki, gemtu lalexbohon dii, da baxqotox nax katuen e, riqe prepax la Bapa Raja fene, "Ama Tuaq Raja, gamahix la ku hapu kon beka, tu yako xmata haix naq anax na." Da xdue fahan paa Bapa Raja hapuh e. Kapala soaro, marinyuro hapuh toqi, paa du alax gandi fena, du alax nak finhaa, nax anax gerano di hansi-hansiax, paa du ol tuha gandi fena. Beko nax anato di du banewe dii, da exdue saa pa Bapa Raja Tifu poah e, saa paa--balax-balax dae Tifu, do Tuaq Penjawat e Bernard ma dae Tifu--Tuaq Penjawat Bernard poah toqi saa. Riq reqa fene anax rua dii Bapa Raja Tifu bapoah dii, saa dii la Behuku, saa dii la Bernard, mar e gebaro di xrei. Du xdueh baa pa Lesnusa. Beko nun ama dii, du hapu fahan haix, pa du eguh gamah Leksula. Du xdueh di bui, eta da bamata xdofo. Sepo dih. Nax anato qaan Hendrik tu Aleks. Hendrik haat. Beko nax anax rua dii, nax wai, Aleks, mata haik e, nax kai, Hendrik, banewe. (Transcribed 10/13/88 by Joe Devin, at Manoa). Mama Eci Behuku Labenu May 23, 1988. Balax-balak e, betu Jou Paul eprenta mahede, do gebar fina Masrete, du caan pao Lisela. Du caan e Raja Lisela pao, Hentihu, bekoq e du jaga sili kwarut fipao gebaro di--Raja fipao Lisela. Bama du sili emtaik e nunu kwaruto moo, beko gebar di egux gampaox, paa du ptea fipao, la du puna xnei fipao eta du sili nunu kwaruto dii. Bama du sili emtaix moo, du oso, pa du baptea baa pao. Oso Islam. Beko Jou Paul e, da toux iero dii, da musix nax kakax-waito fina Masrete, hansiak e barekero fipao Lisela hansiak e. Exdemen dii, bu geran e ro-roin an baa ma na Masrete. Da te tah bex lalen moo, mela, da toho gampao Namlea, paa da fisara fipao Namlea. Fisara fipao Namlea, beko Namlea fipao eruk fene bisa da prenta na Masrete.. Rine puna raja na Masrete. Beko du eruk fixdii, paa Jou Paul e fisara eta da prenta, da puna Raja Behuku na Masrete, beko du taho neten enbelen e, Masrete eta dena fixdoo, e Hentihu sira eta dena fixdoo, Masrete nake eprenta eta dena fixdoo, lalu nax geba sa tewa iko tehux gandi Lisela la du sili kwarux tehux moo, tu sir bakarajaa baa na Masrete, paa nun Raja Masrete sakix baa naa. Balax-balax, do geba sa tewa "Raja" moo, tu gebar batewa "Jou." Bal-balax do Jou baa. Eta haq naa tem geba batewa fen moo tu Raja. Moo, balax-balax, do Jou Paul e. Pa nake endohin, balax-balax, do geba sa sale Injil leux-leux fidi Jou Paul Behuku mohe. Di nax buku haat, bu Jou Paul Behuku qaan yaq da baptis leuk e, pa d puna geba Serane leux di Jou Paul e. Pee tu da eprekex pa d puna Masrete naa paa Geba Seranero. Kahano Slamero bapsia pee, bu exdemen baa paa Geba Seranero di du babaptis haix di. Sepo dii, Bu Joo. (Transcribed 10/13/88 by Joe Devin, at Manoa).