Cada Leksula Probably 1974 Geba rua sa tu nax finhaa. Sira rua tu nin anato pito. Sirua tu nun anax pito dii, sira ptea msika-msikan, geba saa tu sira moo, sira ptea msika-msikan. Pee tu riq prepa la nax finhaa fene, "Kita rua nan anax pito naa, do ma xmataro, tu du bikiq pusiq baa kita rua!" Fene, "Bara, tu nan anato la ma siux, fen ka xmataro la sapan?" Nax ana roin an sa-roi paskal-paskali an--roin an di, do riqe barguna mohe. Riqe pao kolo, paa da bacaan nake ama prepak e nake kairo pito dii. Pee tu riqe puna bakaal la sir iko xnogi. Nax finhaa odo fen ha naa mo, du iko xnogi resex. Pee tu riq puna bakaal sampe exdemen. Du iko xnogi breman. Sira pito di iko, nax wai an di bahai pamori, da egu biskutu fatun fidii, paa da tahu hai di sira mulai suba fidi huma pee, da tahu hai riq wahan et-et-et-et-et-et-etaa du iko-iko-iko-iko-iko sampe beto, du bage. Bage, pee tu riqe--riq bage balalex fidi nax biskutu fatun na, da babage trapex biskutu fatun saa. Pee tu du bage, beto tifun, pee tu nin ama oli, sira babage emsika-msikan. Bage sampe lea pee, du hosax, "yIah! Aman fadoo naa?" Pee tu du hama-hama-hama-hama-hama tohon di, nin wai roin an di babage trapex baa nax biskutu fatun an. Nax kairo hama-hama tohon, riqe fene, "Kimi, do kimi xbele! Aman sira hama la du xmata kita bu kim tewa mo. Laqin beto fen bara yako, do kita tewa tehux mohe." Riqe an bahosax fipao nax enbagex elen fene, "Toux naq biskutu fatun an sa aq na. Ma toux hama biskutu fatun na ta, la ma oli sampe ma bakudapa nan huma." Fen, "Ehe." "Ma toux hama nan biskutu fatan na ta la ma oli." Fen, "Ehe." Du oli dena di huma, pee tu nini ina toux beta sira fisaka, pee tu sira nax ina taqi. Fene, "Nan anato oli haix naa, do ma bara xmataro beka." Fene, "Mo. Yako la a xmataro, tu du bikiq pusiq kita tirin." Pee tu riqe prepa la nake gebhaa fene, "Bara, tu kita nan anato la ma siokor fene ka xmatar dii do kae gana geb megex nax anato." Fen, "Mo. Yako la a xmatar. Kalo kae exreiko, do yako xmata kae toqi." Pee tu ri nax finhaa caan aqa, da mtako. Tako, pee tu prepa fene, "Ramax la lea teme ku iko tuhar la ku mkuako rahex, ramax kae." Riqe, "Do xmasak e bakaal exdeme-xdemen, ramax ya iko tuhar." Lea glinan-glinan pee, du iko. Du iko-iko-iko-iko-iko-iko-iko sampeeeeeee du tewa tehux i sa tehux mohe, tu gamdi du pikir tehux i sa mohe, pee tu du bage. Bage et-et-et-et-et-et-etaa lea, tu du hosak e, pa du hama tohon. Dapax tehux tohon mohe. Pee tu sira pito dii iko-iko-iko-iko-iko-iko-iko sampeeeeeee du dapak e Murampaat nax huma, pee tu Murampaat batoux beta sira fidi tohon, fen, "Lolo-lolo, naq uta boti suba mhewar an si kadux na haix!" Kadux dii, pee tu da frogokor aki kamar, pa da konci subu. Fene, "I har na ta la ma kaaro, tu ma kaa tehux i sa mo naa." Fen, "Mox." Nax finhaa prepa la riqe fene, "Ku iko hama megex, tu i har naa la kita piara, tu kita nan anax sa moh." Fene, "Eh. Do ma piara sira na ta." Lea, pee tu riq iko, paa da hama geba paa sira rua, riq hai riq hama fafu tu tonal paa anato di kaa. Kaa eta har dii sepo, pee tu fene, "Ma kaa tehux i sa mo naa. Ma kaa anato na beka." Fen, "Mox. Ku iko hama lale msia na ta selex. Kalo ku dapax moo, ramak e ma kaa i ha na ta." Riq iko dii, da janji betono pito tem da oli. Fina mtuax di defo tu anato dii et-et-et-et-et-et-etaa ge mtuax di nake exnahu betono rua da oli, sira naa heka! Du heka-heka-heka-heka et-et-et-et-et-et-etaa beton rua di xdeqano, ge Murampaax oli dii, fene, "Anato di har do?" Fene, "Du punbodox yako, pa du heka haix." Fene, "Do ku iix ior naa, tu ramax a tehoro." Riq teho-tehor et-et-et-et-etaa dalam beto rua dii sampe lea, da ti taqoro, pee tu gebaro pito di prepa la nin wai an di fene, "Kita na ta do ma mata na ta, tu Murampaax ti taqo kita haix!" Fene, "Mox. Bara mtako. Asal kim bara mtako, tu ma mata moo." Pee tu riqe naa fene, "Kimi leo, tu ramax yako bajagah." Fene, "Ehe." Sira pito di leo, riq bakerex sohi fidii, pa da egu kau lawan sa fidii, pa da ftebah, pa da batahu paxpelex di tohon di. Murampaax bagitu laqgar pee, gesux kadan, paa i ha baiih pao tohon, paa da baiko tehux mohe, pee tu sir iko. Iko-iko-iko-iko-iko-iko-iko-iko sampeeee sir odo fen, "Mohe, na ta do geba naa, da taqo tehux kita mohe. Iko-iko, paa du bale gamnaa, "Eih! Ge mtuax naa gosa haix naa!" Du xnika nin wai an fene, "Ku mkuax baa geba dii pa da teho tehux mohe ma?" Fen, "Moo, yako nhanux fen da mata haix, tu a ftuha kau lawan sa, pa gesux kadan, pee tu ya odo fene da hai tehux mohe di ta." Fene, "Na ta do ma mata na ta!" Riqe prepa la nax kairo fen, "Mo. Kim bara mtako, tu yako an ma naa! Baa tu kita, do kita nan ina tu nan ama do sir bahefax kita an e, ha gamdi kita--kita tewa ma kas sala nan ina tu nan ama lalen moo, tu cuma sira hefax rahex baa kita. Kim leo, tu ramax yako an bahai." Sira pito leo, riq bahai, pee tu da aqax hama nax kaor omo an sa dii, pa d tahoh. Da baptaho di tohon teme ge mtuax di mata fidi, pa da baxqoton. Pee tu sira heka-heka-heka-heka sampe du dena di masi, pee tu du batea-tea, pee tu du gambar-gambar hai gambar-gambar, pee tu nin wai roi an bagambar-gambar e ena, be da bagambar gamnaa, bee tu dapax nake kapal haa sa. Fene, "Ha naa, " fene, "ya naq kapal ha na, fen bajadi, do kita bakehax i ha q nah." Fene, "Kae, do ka prepa i ha gamdii, bu kae an na, ka tewa ii naa,fen ii naa kae fen sapan?" Fen, "Moo, ii na do kapal na ta. Baprepax gamdii, pa fen mo, ramak e yako iix la kita kehax i ha na ta." Riq bagambar gamnaa, pee riqe fene, "Kim ramboli." Baramboli, pa riqe--kapal di barnama. Fene, "Kim katax ramanim beka. Kim touk e ya naq kapal i ha q na haix. Ma newe na ta, tu--e, kita naa, ma newe na ta." Sira di keha fidii, paa nin wai gamdi puna juragaq. Riqe na bawa motor et-et-et-et-et-et-etaa du iko-iko-iko-iko dena ax pulo roin an sa, fene, "Ma siqga baa na ta." Nake kai fen, "Ma siqga baa naa la ma ptea fidoo, tu neten na mes babeta elex sa cukup la kita." Fen, "Mo. Ma siqga baa na ta, do kim bajaga motor, tu ya keha saka na ta, tu musti kita dapax huma." Riqe naa keha saka fidii, pa da keha gamsakak e, da keha di pulo di mo, tu huma. Huma dii, do huma pake kaca kuliliq. Huma gosax. Pee deq riqe rogo gamax kamar e, rogo gamakik e, ana fina saa, do filan baloa, filan balata! Riqe ha bapesnau aki naa. Pee tu riqe exnika ana fina di fene, "Kae emsikan?" Fen, "Mo, yako tu naqu wairo nee hede." Fene, "Gamdii do kami la kami ptea baa na ta." Fene, "Umh! Kami naa do kam te tarima gebar gamna kimi na moh! Kami hama geb kaya." Fen, "Mo, ramak e--kae la ku hama geb kaya, ramax ya naq kapal naa, paa ramak e ma iko hama dagaq la ma kas basar huma." Fen, "Eeh." Pee tu riqe efrogok e geba dii, fene, "Kae namu--Kae emsikan pi moo?" "Ya naq kairo pito ma pao naa." Fene, "Naq kair pito dii, kami, kam nam ama hefax kami, pee tu kam an iko-iko, kelen e Murampaax kaa kami an, pee tu kami an heka, paa kam dena ax ena saa, pee tu kam bagambar-gambar kapal, pee tu yako an gambar beta naq kapal na ta." Fene, "Ou, kimi naa, nim ama hefax kimi gamdii, do ramax kam tarima kimi." Dena di huma dii, pee tu kamar pito, nake kairo pito di kaweq, riqe an kaweq moo, tu riqe jaga baa nax motor an, pee tu sepuh. Cada Leksula Probably 1974 Nene emkedan tu ri nake ana mhukar pito, sira ptea fidi wae olon emsika-msikan, pee tu ptea di wae olon dii, do geba sa rapat sira moo, tu sira emsika-msika-msikan. Pee tu ptea-ptea, gladat! Sira naa glada, pee tu nini ixnaan sa tehux-tehux mohe, tu sira du hama prahit fidi waer olo, waer olono, uta maden e, paa du tedax, paa du kaa, bu uhano moo, tu sira eglada. Mata la du bemata. Nax anato naa taqi la nin ina fene, "Kita emkua naa, paa kita glada haan-haan naa?" Fene, "Ma iko rahex, la m hama ixnaan." Sira naa iko. Iko beto, iko lea, iko beto, iko lea, dapak e uta maden bu kaa xmatak e, dapak eprahet bu du prahi, dapax tuet e, dapax sapan rahek e, prahi, paa du kaa, paa du iko. Bu te uhano tu ier di mohe. Du iko-iko-iko-iko-iko-iko-iko-iko sampeeeeeeee fene, "Kim basohix na ta,tu a keha kau q naa, la a toux hama hawa, fen me tu ma dapax hawa sa salak." Nin ina mkedan e keha kau emroi emkedan sa fidii, paa dena sax luken, paa da touk e fadi-fadii. Da toux beta Murampaax nax hawa, do fuat e bagon-gone, e warahe hepa da bagon-goner. Warahe bamkeda-mkeda, warahe sax luke, warahe pao di hawa, warahe kali sia haik e, sia fasax nanito, pee tu da kalax gampao nax anato fene, "Kita na ta do ma newe na ta, tu hawa sa aki naa!" Sira pa rahe naa poo du bersu-bersuka! Fene, "Eh!" Toho fisaka rabo-rabo fidi, paa du iko. Iko et-et-et-et-et-et-et-et-et-eta--fidi kaku keha kaku, fidi wae fasa wae, et-et-et-et-eta--du iko dof-dofo hai ha di batoux beta hawa di et-et-eta du dena dii, touk e di trowaet e fu koni saa bagon-gone, gon-gone sax luken. E, nene emkedan e basepak e nake sabel toto di fidii, paa da sepa fidii, paa da fas sobi fuax di folin saka fidii, paa da bawihi logox, paa da toho pao fene, "Kim kaa fuat eq naa, la m basiap-siap, tu Murampaax oli na ta!" Da keha sax loteq fidii, paa da tatix Murampaax nake pala isin e, warahe isin e, sapan rahex sax loteq dii. Da tatik fidii, paa du kaah! Du kaah fidii, paa kaa paa kaa nmalit e, kaa nholut e, enheat e. Exmasax feten, xmasax tonal e! Kalo geba du hefhaik e! Murampaax nax ior paa batalamburaqo ax gidan! Kaa fidii, kaa-kaa-kaa-kaa-kaa sampeeee modan-modan, poo dekax walan kon-konix, lea walan kon-konix. Fen, "Exe! Ha na ta do Murampaax oli na ta! Kimi pito heka la kimi rogo baa di kacaq-panjaq kolon di, tu ramax ya sohik e Murampaax la da oli naa, la da toux fen geba qa geba mhana pi mo!" Paa riq baptea, pa d baka-kaa, pa d batouk e fiaki, pa Murampaax oli, tu geba mkeda ol boti, sawe-sawe sa tu fafu qis snap telux sa. Da batoux fiaki fene, "Eh! Geba sane pa d kadux fi ya naq huma, paa da puna ya naq ior haan aki naa, do riq tewa yako moo!" Da fqadok haix ioro di-dii, poo da heka rabo-rabo fisaka, pa d touk e fina mkedan dii bakaa. Da baslepak e nax gomi mae rep pitux di la da bafola fina mkedan di olon baa dii, da bapana megex, paa da bakaa gos-gosa. Dae tu nax gomi mae rep pitux, paa la d bafola fin tuax di olon baa dii, da heka megex, paa da bakaa gos-gosa. Fen, "Eeh! Fin tuax naa! Da epkitan resex, tu, geba, yako paa a hama geba, geba pkitan-tehu-pkitaq e, a dapax, fen moo tu eta kae sugi mkedan, kae gau sabel toto ian eq naa!" Fene, "Sabel toto, bu kae enhanux fene ku eta di ana mhana xbafan sane fen ku xmatah bu ku keha yako?" Pee tu riqe lapaas fidii, paa sira rua eplatan. Plata-plata-plata-platan e, fin tuax dii da emtai tehux mohe, fene, "Kae eptane, la yako hai qei kae pee!" Murampaat e eptane fidii, paa da hai ***** , tu xroo-xroo tu nake sabel toto dii, da fas telax olon fidii, pa da bamoho logok. Pee tu da kalax nax anato di fidii, pa du kas barsii huma dii. Geba di, du hefakor ox breman e. Exwali di, kalo da xmasak e, du hefax ii ha di ta. Fafu do fafu humkolon e, geba humkolon e, tonal humkolon e, mejaqan humkolon. Pee tu du hefak e--e di humkolon sahex di geba di, du hefax seporo, pee tu sira kas barsii huma dii, paa du ptea baa di hawa xnega dihe, pee tu sira ptea,paa du kaa baa di huma dihe, pee tu sepuh. (Transcribed 12/8/87 and 12/9/87 by Joe Devin, from track 1 of Elias 1). Cada Leksula Probably 1974 Nene emkedan na tu nax opo roin an naa, sira ptea msika-msikan, pee tu nini ixnaan sepu, fene, "Opon e, kita rua iko la ma hana ixnaan, tu kita nani ixnaan sepu." Sir iko di nin hawa moo, siru iko fidi mua hunux mua, fidi mua hunux mua. Du ik-ik-ik-ik-ik-ik-ik-ik-ik-iko sampeeeeee du dapak e Murampaax nax huma. Fene, "Opon e, kita iko sala haix na ta, tu Murampaax nax huma na ta. Ku toux geba tu geba sa. " Fen, "Moox. Kita rua iko baa na ta fen la ma kaa baa nax ixnaax gosa. Tu na ku toux i saka naa, tu feten e, pala, feten isin, pala isin e, biskutu bagon-gone, warahe bamamba eptutu, warahe si emkeda haik e! E da kali sia, paa da baxqotokoro warahe huma da baxritak esbobik, paa warahero baxwaha. Pee tu riqe na keha saka fidii, paa da tatik e warahe, tatik e pala. Paa warahe do da sgela, pala do da papu tu xwali tuf pitut e, feten na da papu tu xwali tuf pitut e. Tonal e, fafu, do da xmasax tu xwali har-haaro, pa i har baptea. Paa nax opo an e bakaa tirax moo, poo riqe ha ptea, pa d sahax exnaax rahex-rahex, paa du basohik e Murampaat. Poo modan-modan, pee tu dekat walan kon-konit e, lipoton walan kon-konix, pee tu riqe prepa la nax opo fene, "Ku jaga, la ku wihi kua na saa, tu yako tolfafak e parteeq rua, tu nasi saa, tu kua saa, la m heka rahek!" Fene, "Ehe!" Nax opo skoi kua pariux haa sa fidii, pa d bawihi, paa da tolfafax, pa d heka tuhah e, riqe wihi nake kua parteeq saa, tu nasi satu parteeq fidii, paa du heka! Heka-heka-heka-Heka-heka-heka-hekaa, Murampaat e teho-teho-teho-teho-teho sampeee da mtai tehux mohe, da kalax fene, "Fina mkedan e, kae la ku heka la ku kaa naq ior haix dii, do ku tahu naqu pariux tu naq parteeq la a hai la a eguh, la ka bara puna nam akal jahat gamdii tu ya naq ioro!" Fina mkeda naa riqe tewa moo, tu riq heka-heka-heka-heka, sampe getex, pa d baweri, nax opo bu getex pa d baweri. Pee deq da STEFO satu-kali dii, olat haat, i ha gamdi masi. Pee tu Murampaat hai, paa da kalax fene, "Fina mkedan ei, kim iko fidoo, la yako la a hai, la kim taho baa naq ior an baa di ta, la a egu, tu a xmata kimi moo!" Fene, "Sogo di tif-tifun dii la ku hai, tu kami Laqina do kam balaqgar baa di ta!" Riqe naa sogo-sogo-sogo, pa d basogo, pa d basogo, et-et-et-et-et-et-et-et-etaaa wae beta raman, pee fina mtuax di nake stefun waen PASA raman fidii, paa da te iko tehux mohe, tu fin tuax dii stefun waen pasa raman, pee tu riqe ha bai-ii baa aki naa, paa da bamol, da bapodal, pa da ino ana fina dii stefun waen et-etaa fukan haa, pee tu da mata. Pee tu fin tuax di hosax fidii, paa da e eprepa fidii pa nake stefun waen e maqix fidii, paa du oli qei wahano fidii, paa du ptea di Murampaax nax huma, pa du manimpaq, paa gebaro dii, du hefak e, sira kali warahero dii, paa du puna lufe, paa du jaga warahero dii pa du maqi, fidi biskutu--sapan rahex ada di huma dii, sira prentah. Pee tu sepuh. (Transcribed 12/9/87 by Joe Devin from track 1 of elias 1). Cada Leksula Probably before 1974 Gebar telo naa, do geba bakawaq gosat. Sira gebar telo naa, do biar bagamdoo tu gamdoo, ii sa sala haan doo, sira telo tewa psefex saro moo. Sia telo do geba bakawaq gosat baa na nagrii na. Di nagrii dii, du ptea-ptea et-et-etaa seir, pee tu sira fene, "Ma iko la kita iko la m iko pe. Kita telo iko pee, tu kita ptea-ptea baaq naa, do sei kita haik." Sira manimpaq nin tas pakeaq, tu nin katueno, tu nini tas pakeaq, paa du iko-iko-iko-iko-iko-iko-iko sampeeee modan e, du glada. Du glada, du dena nagrii saa, "Iqax tu huma naa, do kita kanaal tu geba sa ba na mo. Kita kadux di huma naa, do kita ma ptea di san nax huma naa?" Fene, "Gamnaa, do katefen kita telo naa mao gamdoo la ma dapax ixnaan la m kaa naa?" Gebar telo naa, sira telo qaano: sa qaan e Tugu, sa qaan Togo, sa qaan Taga. Fene, "Kita telo naa, do ma mkua la m kaa ixnaan?" Fene, "Gamnaa." Taga xnika nake nake roko rua. Da xnika leuk e Tugu fene, "E Tugu, kita mkua naa, la ma dapax kaa?" Fene, "Ma mkua, tu kita baiko naa sondor ma hewax bakaal naa, do gamdoo na?" Pee tu da xnika nax roko rua di fen, "Moo. Gamnaa lebae kita gebar telo naa, do saa puna raja! Moo, do kita dena di huma naa, do kita la m kaa ixnaan fidoo? Puna raja, la ma niax gebaro na rahek, la ma kaa ixnaan." Fen, "Ehe!" Fen, "Do kita telo naa, do sane?" Taga xnika Tugu tu Togo fene, "Kimi rua naa, do san timbaq fen sane?" Togo tu tugu prepa fene, "Kae, yaq ka geba prepax di, kae puna raja." Fen, "Ehe." Taga na prepa la sirua fen, "Kalo yax puna raja, kalo ya egu naq ior naa, iqax tu sir aqgap ha naa bukaq raja. Malainkaq kimi rua egu ya naq tas pakeaq, naq katuen, hansiax, la kimi rua egor, tu yako bapake barsii., la ma iko, moo gebar ano percaya fen yako naa bukaq raja." Fen, "Ehe." Riqe naa bapake, paa neces-neces fidi tohon! Paa du iko eta dekax-dekax di huma, Taga prepa la Tugu fene, "Tugu, ku leo, la ku dapax huma pertam-pertama, huma ha di ta, iqax tu ku rogo la ku prepa fene, 'Bapa Raja sa la d kadux na nagrii.'" "Ehe." Da iko, paa dena di huma gilin, fen, "Mox." Tugu leo fidi, paa da prepa la tuaq ruma di fene, "E, hei! Kimi sedia la Bapa Raja, tu Bapa Raja la d kaduk. Bapa Raja fidi breman la da bambakadux naa. Da iko salax mahede la da pariksa nagrii." Geba di caan aqa fen, "Eh-eh-eh-he! Gebar pila, Bapa Raja naa fixdoo haan naa, paa da bakadux tem-temax fina kita naa?" Geba di suba gamaki, paa da kastau kapala kampoq fidii, paa da paha tuba! Paha tuba fidii, paa nagrii taun dii kadux fidii, paa du atur, fen, "Iqax tu ma sohix Bapa Raja!" Sohik e Bapa Raja fidii, paa du siap e teput e, fafu, tonal e, minya, paa du sohix Bapa Raja. Sohix Bapa Raja, da toux fipao, paa geba nagriiro di siap pa du tarima Bapa Raja. Geba rua di baho-hoo tu Taga nake tas pakeaq tu nake katuen hansiax. Riqe leo, paa da bapake bersii, paa sira fen moo i ha naa do raja resex! Pee tu dena saka, paa du sadia kadera gosax-gosat e fidii pa Bapa Raja. Tugu tu Togo fipao naa, sirua dena dii, sira reqa fipa rahe, fen, "Kimi rua ptea fixpao, tu i haq naa la Bapa Raja." Fene, "Ehe." Sira rua baodo rahex fene, "Asa ma kaa." Dena dii, pee tu persilahkan Bapa Raja pa da ptea saka kadera gosa dii, Tugu tu Togo ptea pa rahe. Baptea-ptea, poo du stori-stori tu Bapa Raja sepo, fen, "Mox, geba humaro, kim oli beka, la Bapa Raja inu te peni." Fen, "Ehe." Sira oli fidii, paa du tahu te. Du egu--puna te susu, paa Bapa Raja, geba rua dii, sir goreq baa maqkau fidii, paa du xdue pa geba rua di kaa. Sira rua an ba fipao naa, du egu baa tu te biasa rahex fidii, paa du xdue pax geba rua dii kaa pa du ino te. Bapa Raja kaa roti fisaka naa, sira babaf-bafa lepax la Bapa Raja. Fene sirua bole fen mo seq apa-apa. Ptilo-ptilo, paa du caan aki dapur e, geba huma tobon aki naa, da exmata tepux saa fidii, paa panin espuu-spuu ax dapur. Fen, "Moo, na ta do ma kaa tepux na ta, tu kita ma inu baa te laqina di, bu memaq tu roti naa cukup moo, paa roti naa baa rahex la Bapa Raja." Fidii, paa du xmasa, paa du tahu meja ax dapur naa, paa du flesa meja di tu taflak meja, tu sarfeet hansiak e, tu tahu teratur aki naa pa Bapa Raja. Sira plaqak e Tugu tu Togo nini ixnaan gamaki, sir pahux baa kua ton maqix tu maqkau. Nasi fiaki na po Bapa Raja, pa sirua baliqa fidi fefa. Babafa hai Bapa Raja bakaa tu ixnaax gos-gosa, sira rua an pa rahe. Sira fen, "Ehe. Seq apa-apa. Asa ma dapax la m kaa." Eta beto. Beto, fene--du rogo, pa du manimpaq e kamar sa fixdii pa Bapa Raja. Sira prepa Taga naa fen moo tu "Bapa Raja," padahaal gebaro telo naa du parlente baa la du kaa baa ixnaan! Pee tu du manimpaq elex aki naa pa Bapa Raja, bantal-polo tu bolsak e, sprei, hansiak, tu kalambu paa Bapa Raja bage. Sira egu katin eqan saa fiax hefen fene e Togo tu Tugu bagex i ha di ta.. Sira naa du basefeno fidae laleno fene, "Ah! Kalo kam kaa boho gamnaa, do asa kim egu i gos-gosat an saa la kami an!" Sira rua naa po sira telo naa nin iwagun saa moo. Pee tu beto, paa du babage gamnaa, do bridi. Pee tu du rogo ax kamar na Bapa Raja babage di, paa du pihelan tu Bapa Raja nax kain panas. Pihelan, pihelan, pihelan, paa saa fene--geba rua di fen, "Moo, ke Taga, mahix la kami tu kain panas an di, mo pee tu kae tu ele gosax naa? Kae kaa gamdi gosa, kami an kaa xboho-xboho gamnaa, bu ka musix kami an moo? Geba naa, kita telo naa pe, yako nanux fene ii sa puna kita gamna ta mo, bu ma pun-puna sampe kae an dapak e el gosat e, kami an babage exboho-xboho haan naa, do ku xdue baa kain panas an na la kami!" Du bapihelan, pihelan, pihelan tu kain panas di moo, tem Tugu sefen, teme da bamqaha fene, "Gebarooooo! Taga niax kimi e, tu kami telo iko dii, do kami hewak e ixnaan moo, pee tu kami glada, pee tu kami niax kimi baa, la kami pkehak e Taga, fen moo tu riqe Bapa Raja!" Pee deq geba huma duan di bacaan, deq da bahosa fipao pee, da pemqaha fene, "Gebaroooo, hosak e,tu gebar naa parlente e!" Pee deq nagrii taun di hosa fidii, paa gebar telo dii du heka tehu fidi subu mohe, du hifu hesex, paa du heka, paa du suba ax gidan, paa du heka hai tohon. Gebaro di hosax fidii, paa du pele hansi-hansiax tohon di. Sira naa ILAQ! Du iko, paa tudi beto dii, du iko fidii, paa du bakerek e, paa sira telo bastori-stori, fene, "Asa kae pee, do ku bara puna ha naa di ka rasa namu diri haa, tu fen moo tu kae puna Bapa Raja, la kae puna kami gamdii." Stori-stori moo, pee tu sefeno ute Taga, tu Taga prepa fene, "Ma iix gamdoo, tu yako toqi, ya odo fen moo tu ma puna gamdi ta la bara du dapa-tau mo, bu kimi rua naa, kim te sabar moo. Biar kim kaa gamdii, bu seq-apa-apa, tu ramax la ma iko xdedux, teme--tu kita naa bukaq kita ptea baa na moo, tu lea pee tu ma iko." Eplawa-plawan moo, pee tu du odo nin pakeaqor naa, la du saki la du egoro, du mtako, pee tu du stori tehux ii sa mohe, pee tu du iko epsaman rahex. Pee tu sepuh. (Transcribed 12/24/87 from track 2 of Elias tape 1 by Joe Devin). Cada Leksula Probably before 1974 Ana mhuka rua saa. Ana mhuka rua naa, do sira rua msika-msikan. Sirua ptea msika-msikan, pa sira rua ptea-ptea, du iko mhoro wae. Iko mhoro wae, pa du mhoro-mhoro-mhoro-mhoro-mhoro-mhoro-mhoro sampeeee du mlapa. Du mlapa mlahi, pee tu sira du basela-sela wae, poo du touk e sau saa bagone emruru-mruruk sax luke. Pee tu sira rua keha sax luke fixdii, paa du kaa sau di. Kaa-kaa, poo du batatak e kihano di parahe, du toux parahe, fafu qis-snap-telu saa da bahedak e sau na parahe. Pee tu sira rua du toux-toux fafu pao naa, la du mkuax? Du toho pao naa, fafu pao naa kaaro. Pee tu nax kai prepa la nax wai fene, "Kesu katanan di luken, la ma suri sau na saa, la da moho pao, la da kaah." Fen, "Ehe." Nake wai di, di, da kesuk e nin katana xmara saa fixdii, paa da xdueh paa nax kai, paa nax kai kua sau di saa fidii, pa d fagex pao, paa fafu di basaqah epremak. Fafu di bakaa-kaah, pee tu katanan luken di fastelak e maan fidii, paa maan bamohoh, pee tu fafu di i ha bapai-pai parahe. Pee tu sirua toho pao, paa la du mkuak efafu naa? Du sarholi emtaix mo. Baa naa, do epax-epak e nene emkedan an saa baa na ta. Nake kai siux nax wai fene, "Wai, ku iko dae dae e Sugibantursia dae, la da laix kita tu bana in saa." Nax wai iko dae, pa d laha fene, "E, Sugibantursia e, kami tu bana i an di saa." Fene, "Ku saqajar yako an, paa naq kau tur sia an pao na rahex, fene ku eguh an la sapan?" Da oli, la da prepax nax kai fene, "Kain e, Sugibantursia xreix nax bana." Fene, "Ah! Saki la ku prepax fene, 'Ramak e kami xma--tono baa nam utan ano na la kam kaa rahex." Da saki dae fen, "Sugibantursia e, kain fen ku laix kami tu bana an di saa, la kam tono nam utan ano la kam kaa." Fene, "k"Kimi rua naq utano dii, do kimi laix yako tu sia, do bole." Fen, "Moo, Sugibantursia e, ro-roin ano rahex." Fen, "Mox. Ku ix sakix la ku xdue sa la yako." Da oli lawe, paa da prepa la nax kai fene, "Kain e, Sugibantursia fene kalo kita nan utano naa, do ma laik e riqe bole." Fen, "Ah! Prepax fene qesax riqe moo, tu roin ano tirin" Fene, "Mox. Ku saki la ku prepax dae tu utan an na sia pa;lex mo." Da saki dae fen, "Sugi Bantursia e, utan ano sia palex moh, tu ro-roin ano rahex la yako tu kain kaa,tu kami an glada." Fen, "Moo. Oli la prepa la nam kai fene musti da laix yako, moo do a laix kim tu bana mo." Oli lawe, fene, " Ku saki dae prepa la Sugi Bantursia fene, 'Utan an na fanan an emsian.'" Fene, "Ku saki dae prepax gos-gosa." Saki dae, da prepax fene, "Sugi Bantursia e, utan na lawe na fanan an emsian." Fen, "Moo. Fana msian, bu da psamak an, la kim laix yako an, a laix kimi tu bana." Da saki dae, paa da prepa la nake kai fen, "Kain e, sugi emtuax dae na fene fanan an emsian, bu i da psamak." Tu da saki dae fene, "Sugi Bantursia e, fanan an emsian. Naa do ma psamak an naa, do . . ." Fene, "ramax ya hai lawe tu bana." Da tuuk e nake kau tur sian fidii, paa da hai lawe. Da bakita ana fina rua di batahu fafu haa di, riqe fene, "Hi-hix! Opon rua niax yako tu sira la du kaa msikan fafu q naa!" Pee tu la da mkuax gamdoo, fene, "Opon e, lobox bana, la ma xnahi nim fafu,tu kimi niax yako fen la kim kaa msikan e fafu haa aq naa." Riqe naa--du lobox bana rabo-rabo fidii, paa Sugi Bantursia naa, do riqe karjaa rahek. Riqe kita fafu naa, pee tu riq karjaa rabo-rabo rahek. Paa riqe karjaa rabo-rabo, paa da fasax eqat e, hetex kau, paa da lobox, paa e fafu di, riq baxnahih emsika-msikan, anax rua di ba baf-bafa. Sepo, paa riq fotoh, paa du pefa fafu di isin paa du kaa. Pefa sepo, fene, "Opo rua, kimi rua iko loma fafu di fukan, tu yako a bajaga fafu na." Fene, "Ehe." Sira rua wihi fafu fukan di, paa du iko tohox wae, paa du fene, "Nene, ma lomah ma na beka." Fen, "Moo. Lomah dae peni, tu gebaro estei baa, du stef baa baa ax di ta." Fen, "Nene, baa naa beka." Fen, "Moo, gamdaex peni." Rin baniax baa nax opo rua di et-et-et-eta du iko sampee riq kita tehokor mohe, pee tu da egu nax fodo kase rua fidii, paa da pibreu fafu di. Da pexbreu fafu di fidii, paa da pebeh tu nax fodo kase rua. Dii, paa da reqeh. Anax rua dii loma fafu fukan di rabo-rabo fidii, paa du oli, fene--nax wai prepax nax kai fene, "kain e, Sugi Bantursia egu nan fafu haix, paa da oli tuhah!" Fene, "Ma teho!" Sira rua basook fafu fukan e, du teho. Teho-teho-teho-teho,-teho sampeee du dapak e fin tuax dii. Fin tuax dii bareqe fodo dii, paa i ha baxboko-boko. Fene, "Opon e, e, lakax saa pihi nam fodo dii!" Fene, "Opon e, hai la ku pisu sqapax, tu a mtai tehux mohe." Sirua hai tu fatu haa saa fixdii, paa du fae fafu, paa du pebe di nax wai nax fodo, riqe naa ba--nake kai egu fatu haa sa fidii, pa d pebeh, pa d beha. Ik-iko, fen, "Opon e, lakax di pihi nam fodo dii!" Du hai fidii, paa du fae fafu dii kadan saa, paa pebe di fodo, paa nax wai bareqeh e. Du egu fat haa saa, paa du pebeh. Fene--ik-ik-ik-ik-ik-ik-ik-iko, fene, "Opon e, lakax sa pihi nam fodo." Fene, "Opoo, hai la ku pisu sqapax, tu a mtai tehux moh." Hai fidii, pa du fae fafu dii fahan sa xdedux, paa du pebeh di fodo. Du egu fat haa saa, paa du pebeh di fodo dii, paa du fae snain kahan! Pee tu du baptea. Fene--du iko-iko-iko-iko-iko-iko et-et-et-et-etaa breman e, nax kai mqaha la nene di fene, "Nene, nene, nene! Lakax saa pihi nam fodo di." Pee tu da fae fix--du fae fafu dii kadan tu fahan exdedux, pa du pebe di fodo, pee tu sepu fafu dii. E, Nene bareqe fodo di emsika-msikan tu fatu di. Riqe ha baxboko-boko tu fodo di, sampe da oli, paa dena di nax gebhaa, fene, "Geba naa, ku lamak e--ku fae nan pirino tu nani xwaliro, la ku lamakoro ax gidan, la a tofax ior na." Riqe naa, nax gebhaa na caan naa, da FAE nake exwali fidi humdamun e, fidi pirin, fidi pirin tokax-tokat e! Pee tu da lamakor pao, paa nax finhaa naa badendam--da bamnigi-mnigi tu fodo na. Fixdii, paa da--fene, "Sepo haix dii?" Fen, "Ehe." Riqe naa bamnigi-mnigi tu fodo, da tuux i sa fisaka, teme da tofax fatu gampaox, teme fatu flali pregax nake exwalir, nax pirin et-et-etaa sepo staiko! Pee tu da ix gamdoo? Pee tu da TAQI! Taqi-taqi-taqi-taqi-taqi, moo tu da tehu qei ana fina rua. Da oli lahe dii, paa da hama ana fina rua di. Ana fina rua di heka, pee tu da kalax baa la ana fina rua fene, "Kim heka paa kim pimbodox kon haix, bu ramax tu naq bana an banewe ma di kimi di ta. Pee tu sepuh. (Transcribed 12/25/87 by Joe Devin from track 2 of Elias tape 1).